اسرئیلی عجائب گھر نے ایرانی حملے کے خوف سے فن پارے چھپا دیے

اسرائیل  کے شہر تل ابیب میں قائم عجائب گھر نے ایران کے ممکنہ حملے کے خوف سے اپنے قیمتی فن پاروں کو تہہ خانوں میں چھپا دیا ہے۔

اے ایف پی نیوز کے مطابق تل ابیب میوزیم آف آرٹ میں قائم تہہ خانے (محفوظ پناہ گاہ) میں ان فن پاروں کو چھپانے کا مقصد انھیں میزائل حملوں سے محفوظ رکھنا ہے۔

عجائب گھر کے عملے نے 7 اکتوبر 2023 سے جاری غزہ اسرائیل جنگ کے پیش نظر چند قیمتی فن پارے پہلے ہی محفوظ مقام پر چھپا دیے تھے جن میں پابلو پکاسو اور گستاو کلیمٹ کی نادر پینٹنگز شامل ہیں۔

اسرائیل کو ایران اور حزب اللہ کی جانب سے ملنے والی دھمکیوں کے بعد عجائب گھر انتظامیہ نے یہ احتیاطی قدم اٹھایا ہے۔

عجائب گھر میں قائم مختلف گیلریوں کی خالی دیواروں پر اب صرف پینٹنگز لٹکانے کے کیل نظر آ رہے ہیں جو ظاہر کرتے ہیں کہ کبھی یہاں تصاویر لٹکی ہوئی تھیں۔

عجائب گھر کی ڈائریکٹر تانیہ کوین ازیلی کا کہنا ہے’ گذشتہ چار پانچ دنوں میں جب حزب اللہ تنظیم اور ایران کی جانب سے نیا خطرہ سامنے آیا ہے تو ہم نے محسوس کیا کہ احتیاطی تدابیر اختیار کرنے کی ضرورت ہے۔‘

میزائل حملوں کے خطرے کی کوئی واضح صورتحال سامنے نہیں آ رہی اور خطرہ موجود ہے لہذا ہم نے آرٹ کے کئی شاہکار نمونے دیواروں سے اتار دیے اور انہیں تہہ خانوں میں قائم محفوظ پناہ گاہوں میں منتقل کر دیا۔

 تانیہ کوین ازیلی نے بتایا کہ کچھ نمونے پناہ گاہوں میں محفوظ جگہ پر ڈسپلے کے لیے رکھے گئے ہیں تاہم زیادہ قیمتی اور نایاب فن پاروں کو مضبوط لوہے کی جالیوں کے پیچھے  چھپایا گیا ہے۔

عجائب گھر میں جدید آرٹ کی اسسٹنٹ کیوریٹر ناتھالی اینڈریجاسیوک نے بتایا ہے ’ ہمارے پاس پکاسو کے مختلف ادوار کا کچھ کام ہے جو عام طور پر گیلری میں ہوتا ہےاور دیواروں پر ایک دوسرے کے ساتھ آویزاں رہتا ہے لیکن اس وقت تہہ خانے میں بالکل مختلف ترتیب سے رکھا گیا ہے۔

اینڈریجا سیوک نے مزید کہا ’7 اکتوبر کو ہمیں نہیں معلوم تھا کہ یہ سب کیا ہو رہا ہے، ہم صرف اتنا جانتے تھے کہ پورے ملک میں کچھ خوفناک ہو رہا ہے۔‘

راکٹ حملے ہو رہے تھے اور ہم خوفزدہ تھے کہ راکٹ گیلری کی چھتوں کو توڑ کر ہمارے فن پاروں کو نقصان پہنچائیں گے۔

گذشتہ ہفتے سے جاری حالت کے پیش نظر یہاں موجود فن پاروں کو کسی حملے سے محفوظ رکھنے کے لیے سب اہتمام کر رہے ہیں لیکن ہمیں امید ہے کہ حملہ نہیں ہوگا۔