سعودی وزیر مملکت کا امیر کویت اور ولی عہد سے اظہار تعزیت

سعودی وزیر مملکت اور کابینہ کے رکن شہزادہ ترکی بن محمد بن فہد نے  دورہ کویت کے دوران  سعودی قیادت کی جانب سے نیشنل گارڈ کے سربراہ شیخ سالم العلی السالم المبارک الصباح کے انتقال پر تعزیت کا اظہار کیا ہے۔

ایس پی اے کے مطابق انہوں نے سعودی قیادت کی طرف سے امیر کویت شیخ مشعل الاحمد الجابر الصباح، ولی عہد شیخ صباح خالد الحمد المبارک الصباح، شیخ سالم کے بچوں اور خاندان کے افراد سے تعزیت کی۔

 کویت میں سعودی سفیر شہزادہ سلطان بن سعد بن خالد  بھی ان کے ہمراہ تھے۔

یاد رہے کویتی امیری دیوان کے مطابق نیشنل گارڈ کے سربراہ شیخ سالم العلی السالم المبارک الصباح پیر کو انتقال کرگئے تھے، ان کی عمر 98 برس تھی۔

نیشنل گارڈ کے سربراہ کے علاوہ انہوں نے کئی عہدوں پر فرائض انجام دیے جبکہ 2005 سے قومی سلامتی کونسل کے رکن تھے۔