امریکی ٹیکنالوجی کمپنی ایپل نے مصنوعی ذہانت سے لیس آئی فون 16 سیریز سمیت نئے پراڈکٹس لانچ کر دیے ہیں۔
پیر کے روز ایپل پارک میں ہونے والے ایونٹ کے بعد سے ہی ایپل کی نئی پراڈکٹس سوشل میڈیا پر زیر بحث ہیں جن میں نیا آئی فون 16، 16 پرو، آئی پوڈز 4، ایپل واچ 10 اور واچ الٹرا 2 شامل ہیں۔
مزید پڑھیں
-
سام سنگ گلیکسی ایس 24 میں کون کون سے نئے فیچرز ہوں گے؟Node ID: 828381
-
ایپل صارفین دل کی دھڑکن سے ڈیوائسز اَن لاک کر سکیں گے؟Node ID: 876076
سماجی رابطے کی ویب سائٹ ایکس (سابق ٹوئٹر) پر جہاں ایپل کے صارفین کمپنی کے نئے پراڈکٹس پر اپنا ردعمل دے رہے ہیں وہیں ایپل کی حریف سمجھی جانے والی کورین ٹیکنالوجی کمپنی سام سنگ نے بھی ایپل کے لانچ ایونٹ پر ردعمل دیا ہے۔
10 ستمبر کو سام سنگ امریکہ نے اپنے ایکس اکاؤنٹ سے اپنی ایک پرانی پوسٹ دوبارہ شیئر کرتے ہوئے ایپل کے لانچ ایونٹ پر دلچسپ اور مزاحیہ ردعمل دیا۔
سام سنگ کی پرانی پوسٹ میں لکھا گیا تھا ’ہمیں بتایے گا جب یہ فون فولڈ ہو پائے۔‘ سام سنگ امریکہ نے اس سال بھی وہی پوسٹ دوبارہ شیئر کر کے لکھا ’ہم ابھی تک انتظار کر رہے ہیں۔‘
اس پوسٹ کے ذریعے سام سنگ نے اس بات کی طرف اشارہ کیا کہ ایپل ابھی تک فولڈ فون بنانے کی دوڑ میں ان سے پیچھے ہے۔
سام سنگ کی اس پوسٹ پر سوشل میڈیا صارفین نے بھی کافی کمنٹس کیے ہیں۔
ٹیک ورل نے لکھا ’آئی فون بھی فولڈ ہو سکتا ہے، مگر ایک ہی بار۔‘
ایک اور صارف نے لکھا ’یہ شاید فولڈ تو ہو جائے لیکن کیا اس کے بعد استعمال کے قابل رہے گا؟‘
ایک پوسٹ میں ایپل فین نے جواب دیا ’کیا آپ ایئر ڈراپ کر سکتے ہیں؟‘
ایک اور صارف نے لکھا ’فولڈ فونز کے بارے میں کوئی پروا نہیں کرتا۔‘