انڈین پروازوں کو ایک ہی دن میں کم از کم 50 بم کی دھمکیاں موصول

انڈین ایئرلائنز کو بم کی دھمکیوں کا سلسلہ رک نہ سکا اور اتوار کو ایک ہی دن میں کم از کم 50 پروازوں کو بم کی دھمکیاں موصول ہوئیں۔ گذشتہ دو ہفتوں کے دوران 350 سے زیادہ پروازوں کو اسی طرح کی صورتحال کا سامنا کرنا پڑا ہے، زیادہ تر دھمکیاں سوشل میڈیا کے ذریعے دی جا رہی ہیں۔

ہندوستان ٹائمز کے مطابق اتوار کو اکاسا ایئر نے اطلاع دی کہ اس کی 15 پروازوں کو سکیورٹی الرٹ موصول ہوئے۔ مکمل معائنے کے بعد تمام طیاروں کو آپریشن کے لیے کلیئر کر دیا گیا۔ انڈیگو کی 18 پروازوں کو دھمکیاں موصول ہوئیں، جبکہ وستارا کی 17 پروازوں کے لیے الرٹ دیا گیا۔

ہوابازی کے وزیر کے رام موہن نائیڈو نے اتوار کو اعلان کیا کہ مرکز ایسے افراد پر پابندی لگانے کے اقدامات پر غور کر رہا ہے جو ہوکس بم کی دھمکیاں دیتے ہیں۔

انہوں نے کہا کہ ’ہم ان کی روک تھام کے لیے بین الاقوامی ایجنسیوں، قانون نافذ کرنے والے اداروں، انٹیلی جنس بیورو کا تعاون بھی لے رہے ہیں۔ ہم سول ایوی ایشن کے دو قوانین میں تبدیلیاں لانے کی منصوبہ بندی کر رہے ہیں۔ اس قسم کی سرگرمیوں کا سہارا لینے والوں کو سخت سزا دی جائے گی اور جرمانہ عائد کیا جائے گا۔ ہم ایسے افراد پر پابندی لگانے کے لیے بھی اقدامات کر رہے ہیں، ہم آنے والے دنوں میں ان کا اعلان کریں گے۔‘

انڈین حکومت نے سوشل میڈیا پلیٹ فارمز کو خبردار کیا ہے کہ اگر وہ غلط معلومات کو فوری طور پر ہٹانے کے حکم کی تعمیل نہیں کرتے تو قانون کے تحت نتیجہ خیز کارروائی ہوگی۔

حکومت نے سنیچر کو ایک ایک بیان میں کہا کہ ’ایئرلائنز کو جعلی بم دھمکیاں دینے جیسا بدنیتی پر مبنی عمل ریاست کے امنِ عامہ اور سلامتی کے لیے ممکنہ خطرے کا باعث بنتا ہے۔‘