پی ٹی آئی احتجاج میں التوا کے لیے باعزت راستہ تلاش کر رہی ہے: خواجہ آصف

وزیر دفاع خواجہ محمد آصف نے کہا ہے کہ پاکستان تحریک انصاف (پی ٹی آئی) 24 نومبر کے احتجاج کے التوا کے لیے باعزت راستہ تلاش کر رہی ہے۔ 

جمعرات کو پارلیمنٹ ہاؤس میں صحافیوں سے گفتگو کرتے ہوئے وزیر دفاع خواجہ آصف نے کہا کہ عمران خان کی رہائی کا تاحال کوئی امکان نہیں ہے۔ اس وقت انہیں ریلیف ملنا ممکن نہیں ہے۔

انہوں نے دعویٰ کیا کہ ’پی ٹی آئی اپنی احتجاجی حکمت عملی سے پیچھے ہٹنے کی کوشش کر رہی ہے تاکہ 24 نومبر کے احتجاج سے بچا جا سکے۔‘

خواجہ آصف کا کہنا تھا کہ ’سیاسی اور عسکری قیادت ملکی معاملات کو آگے لے کر جا رہی ہے لیکن پی ٹی آئی اب راہ فرار ڈھونڈ رہی ہے۔ ایک سوال کے جواب میں انہوں نے تصدیق کی کہ علی امین گنڈاپور روز اول سے وفاقی حکومت اور اسٹیبلشمنٹ کے ساتھ رابطے میں ہیں۔‘

 انہوں نے مزید کہا کہ ’گنڈاپور بانی پی ٹی آئی کی مرضی سے اسٹیبلشمنٹ کے ساتھ رابطے کر رہے ہیں اور احتجاج سے غائب ہو کر اچانک منظر عام پر آ جاتے ہیں۔‘

’احتجاج کے لیے ابھی دو دن باقی ہیں اور اس دوران بہت کچھ ہو سکتا ہے۔‘

وزیر دفاع نے پی ٹی آئی پر تنقید کرتے ہوئے کہا کہ پی ٹی آئی کے کارکن ملک میں تباہی پھیلانے کے ساتھ بیرونی فنڈنگ بھی حاصل کر رہے ہیں۔

توشہ خانہ 2 کیس کی سماعت 26 نومبر تک ملتوی

توشہ خانہ 2 کیس کی سماعت 26 نومبر تک ملتوی کر دی گئی ہے۔جمعرات کو سپیشل جج سینٹرل شاہ رُخ ارجمند نے سماعت کی۔ سماعت میں بانی پی ٹی آئی عمران خان کو عدالت پیش کیا گیا جبکہ اُن کی اہلیہ بشریٰ بی بی عدالت میں حاضر نہیں ہوئیں۔

عدالت نے بشریٰ بی بی کی حاضری سے استثنیٰ کی درخواست منظور کرلی۔ ملزمان پر آج بھی فرد جرم عائد نہیں ہو سکی۔

ابھی تک انٹرنیٹ بند کرنے کی ہدایت نہیں آئی: چیئرمین پی ٹی اے

پاکستان ٹیلی کمیونیکیشن اتھارٹی کے چیئرمین ریٹائرڈ میجر جنرل حفیظ الرحمان نے کہا ہے کہ ابھی تک وزارت داخلہ سے انٹرنیٹ بند کرنے کی ہدایت نہیں آئی ہے۔

مقامی میڈیا میں رپورٹ ہوا تھا کہ حکومت نے 23 نومبر سے اسلام آباد، خیبر پختونخوا اور پنجاب میں انٹرنیٹ اور موبائل فون سروس بند کرنے کا فیصلہ کیا ہے۔

اسلام آباد میں یوتھ سیفٹی کانفرنس کے موقع پر صحافیوں سے گفتگو میں پی ٹی اے چیئرمین نے ایک سوال کے جواب میں کہا کہ وزارت داخلہ سے ابھی تک انٹرنیٹ بند کرنے کی ہدایت نہیں آئی ہے۔

اس موقع پر وزیر مملکت برائے انفارمیشن ٹیکنالوجی شزہ فاطمہ سے بھی یہ سوال ہوا کہ کیا حکومت انٹرنیٹ بند کر رہی ہے؟ تو ان کا کہنا تھا کہ ’کسی کو انٹرنیٹ بند کرنے کا شوق نہیں، انتہائی مجبوری ہو گی کہ پی ٹی اے کو وزارت داخلہ کی طرف سے کوئی ہدایت آئے اور انٹرنیٹ بند کرنا پڑے۔‘

پی ٹی اے چیئرمین نے وی پی این کے حوالے سے کہا کہ انفرادی طور پر بھی رجسٹریشن کروائی جا سکتی ہے، تفصیلات پی ٹی اے کی ویب سائٹ پر موجود ہیں۔

صحافی نے چیئرمین پی ٹی اے سے سوال کیا کہ آیا عام آدمی بھی وی پی این رجسٹر کروا سکتا ہے تو پی ٹی اے چیئرمین نے کہا کہ عام بندے کو وی پی این کی کیا ضرورت ہے۔

دوسری جانب پی ٹی اے کی ویب سائٹ پر نظر ڈالی جائے تو وی پی این رجسٹریشن کے آن لائن فارم پر کمپنیوں اور انفرادی رجسٹریشن کا ذکر ہے، اور انفرادی سے مراد فری لانسرز ہیں۔ 

تاحال یہ بات واضح نہیں کی گئی کہ عام شخص جو کسی کمپنی کا مالک یا فری لانسر نہیں، آیا وہ وی پی این رجسٹری کروا پائے گا یا نہیں۔

ضلعی انتظامیہ کی درخواست پر راولپنڈی، اٹک اور جہلم میں رینجرز طلب

محکمہ داخلہ پنجاب نے انتظامیہ کی درخواست پر تین اضلاع میں رینجرز کو طلب کر لیا ہے۔

جمعرات کو محکمہ داخلہ پنجاب نے رینجرز کی خدمات کے لیے وفاقی وزارت داخلہ کو باضابطہ درخواست بھجوا دی۔

محکمہ داخلہ پنجاب کی جانب سے جاری بیان میں کہا گیا ہے کہ راولپنڈی اور اٹک میں رینجرز کے دو دو ونگز اور جہلم میں ایک کمپنی کی سفارش کی گئی ہے۔

راولپنڈی اور اٹک میں رینجرز 22 نومبر سے غیر معینہ مدت کے لیے تعینات ہوں گے جبکہ جہلم میں 22 سے 27 نومبر تک تعینات کرنے کی سفارش کی گئی۔

راولپنڈی، اٹک اور جہلم میں رینجرز کی تعیناتی کا فیصلہ ضلعی انتظامیہ کی سفارش پر کیا گیا۔

تھانہ نیو ٹاؤن مقدمہ: عمران خان کا پانچ روزہ جسمانی ریمانڈ منظور

انسداد دہشت گردی کی عدالت نے راولپنڈی کے تھانہ نیو ٹاؤن میں درج مقدمے میں سابق وزیراعظم عمران خان کا پانچ روزہ جسمانی ریمانڈ منظور کر لیا ہے۔

پراسیکیوٹر کی جانب سے 15 روزہ جسمانی ریمانڈ کی استدعا کی گئی تھی، تاہم عدالت نے پانچ روزہ جسمانی ریمانڈ منظور کرتے ہوئے 26 نومبر کو دوبارہ پیش کرنے کا حکم دیا۔

جمعرات کو اڈیالہ جیل میں اس مقدمے کی سماعت انسداد دہشت گردی عدالت کے جج امجد علی شاہ نے کی۔

توشہ خانہ ٹو کیس میں ضمانت کے بعد راولپنڈی پولیس نے سابق وزیراعظم عمران خان کی تھانہ نیو ٹاؤن کے مقدمے میں گرفتاری درج کی تھی۔

ترجمان راولپنڈی پولیس کے مطابق مقدمہ جلاؤ گھیراؤ، پتھراؤ، پولیس سے مزاحمت، سرکاری املاک کی نقصان رسانی سمیت دیگر واقعات پر درج کیا گیا تھا۔

انسداد دہشتگردی عدالت کے پراسیکیوٹر، تھانہ نیوٹاؤن کی تفتیشی ٹیم اور عمران خان کے وکلا بھی اڈیالہ جیل میں موجود تھے۔

 احتجاج میں سرکاری مشینری نہ استعمال کی جائے، وزارت داخلہ کا چیف سیکریٹری کے پی کو خط

وفاقی وزارت داخلہ نے چیف سیکریٹری خیبر پختونخوا کو مراسلہ لکھا ہے جس میں یہ یقینی بنانے کو کہا ہے کہ 24 نومبر کے احتجاج میں سرکاری مشینری، سامان، اہلکار، یا سرکاری پیسے کا استعمال نہ کیا جائے۔

خیال رہے کہ پاکستان تحریک انصاف نے 24 نومبر کو ڈی چوک میں احتجاج کی کال دے رکھی ہے۔

بدھ کی شام کو اسلام آباد کی انتظامیہ نے ڈی چوک میں کنٹینرز پہنچا دیے تھے جن کے ذریعے ریڈ زون میں داخلی راستوں کو بند کیا جائے گا جبکہ دارالحکومت میں امن و امان بحال رکھنے کے لیے رینجرز اور ایف سی کو بھی خصوصی اختیارات سونپے گئے ہیں۔

‏سپریم کورٹ کے آئینی بینچ نے آڈیو لیک کمیشن پر حکومت سے رپورٹ طلب کر لی

‏سپریم کورٹ کے آئینی بینچ نے آڈیو لیک کمیشن پر وفاقی حکومت سے رپورٹ طلب کر لی ہے۔ عدالت نے اٹارنی جنرل کو حکومت سے ہدایت لے کر آگاہ کرنے کا حکم دیا ہے۔

صوبہ پنجاب میں قیدیوں کی سزا کے قواعد و ضوابط جاری

محکمہ داخلہ پنجاب نے جیل قوانین کی خلاف ورزی پر قیدیوں کی سزا کے قواعد و ضوابط جاری کرتے ہوئے سپروائیزری افسر کے اختیارات میں اضافہ کر دیا ہے۔

نئے قواعد و ضوابط کے تحت سپرٹنڈنٹ جیل یا کوئی افسر ضابطے کے بر خلاف کسی قیدی کو سزا نہیں دے سکے گا۔

سزا سے قبل مکمل انکوائری کی جائے گی اور رپورٹ فوری طور پر متعلقہ ڈی آئی جی جیل کو بھجوائی جائے گی۔ 

دوران انکوائری قیدی کو اپنی بے گناہی ثابت کرنے کا پورا موقع دیا جائے گا اور کسی قیدی کو پنشمنٹ بلاک میں نہیں رکھا جا سکے گا۔

شفاف انکوائری کے بعد پنشمنٹ بلاک میں رکھے جانے والا قیدی سزا میں معافی کے حق سے محروم ہو جائے گا۔

لاہور: دھواں چھوڑنے والی گاڑیوں کے خلاف کارروائی، داخلی و خارجی راستوں پر ناکے قائم

لاہور ہائیکورٹ کے حکم پر دھواں چھوڑنے والی گاڑیوں کے خلاف کارروائیوں میں چوبیس گھنٹے میں 32 لاکھ کے جرمانے عائد کیے گئے ہیں۔

سی ٹی او لاہور کا کہنا ہے کہ آرٹیفشل انٹیلیجنس سسٹم کی مدد سے بھی دھواں چھوڑنے والی 187 وہیکلز کو ای چالان جاری کیے ہیں۔

شہر میں 41 اینٹی سموگ سکواڈز تشکیل دیے گئے ہیں اور داخلی و خارجی راستوں پر 12 ناکے لگائے گئے ہیں۔

24 نومبر تک لاہور میں ہیوی ٹریفک کا داخلہ مکمل طور پر بند رہے گا۔