مملکت میں منشیات کے 2 غیرملکی سمگلروں کو سزائے موت

سعودی وزارت داخلہ  نے کہا ہے کہ مشرقی ریجن اور مدینہ منورہ ریجن میں منشیات کی سمگلنگ میں ملوث 2 غیرملکیوں کو اتوار کو سزائے موت دے دی گئی۔

سعودی خبررساں ادارے ‘ایس پی اے‘ کے مطابق سیکیورٹی حکام نے مملکت میں ہیروئن سمگل کرنے والے ایک انڈین شہری سکھجندر سنگھ کو گرفتار کیا اور اس نے تفتیش کے دوران اپنے جرم کا اعتراف کرلیا جس پر اسے عدالت میں پیش کردیا گیا جہاں عدالت نے اقبالی بیان اور شواہد کی بنیاد پر اسے سزائے موت کا حکم دے دیا۔

دوسری جانب مدینہ منورہ ریجن سیکیورٹی فورس نے نائجیریا کے ایک شہری کو مملکت میں کوکین سمگل کرنے پر گرفتار کرلیا۔ اس سے تفتیش کی  گئی تو ابتدائی تحقیقات کے دوران اس نے اپنا جرم قبول کرلیا جس پر اس کا چالان عدالت میں پیش کردیا گیا۔

عدالت نے اقبالی بیان اور شواہد کے بعد اسے سزائے موت دینے کا حکم صادر کردیا۔

وزارت داخلہ کا کہنا تھا کہ عدالتی فیصلے کے بعد ایوان شاہی کے حکم پر اتوار 6 اپریل 2025 کو مشرقی ریجن اور مدینہ منورہ ریجن میں منشیات کے دونوں سمگلروں کو سزائے موت دے دی گئی۔

سعودی وزارت داخلہ کا کہنا ہے کہ معاشرے میں نشہ آور اشیاء پھیلانے والوں سے سختی سے نمٹا جائے گا اور مملکت میں منشیات کی سمگلنگ اور دھندا کرنے والوں کو سخت سزا ئیں دی جاتی ہیں۔