شاہ سلمان بن عبدالعزیز نے ریاض میٹرو پروجیکٹ کا افتتاح کردیا

سعودی عرب کے فرمانروا  شاہ سلمان بن عبدالعزیز نے بدھ 27 نومبر 2024 کو ریاض میٹرو پروجیکٹ کا افتتاح کردیا۔

میٹرو سروس سے ریاض کے ٹریفک ازدحام میں کافی حد تک بہتری آنے کی امید ہے۔

سعودی خبر رساں ادارے ’ایس پی اے‘ کے مطابق افتتاح سے قبل شاہ سلمان بن عبدالعزیز کو ریاض میٹرو کے حوالے سے وڈیو دکھائی گئی جس میں بتایا گیا تھا میٹرو سروس ایک عظیم منصوبہ تھا جو اس دورِحکومت میں مکمل ہوا۔

ریاض میٹرو کے 6 ٹریکس ہیں جن کی مجموعی لمبائی 176 کلو میٹر ہے جبکہ سٹیشنز کی تعداد 85 ہے جن میں 4 مرکزی سٹیشنز شامل ہیں۔

اس موقع پر ولی عہد شہزادہ محمد بن سلمان بن عبدالعزیز نے شاہ سلمان بن عبدالعزیز کو خصوصی شکریہ ادا کیا جن کی بے مثال معاونت اور سرپرستی سے میٹرو سروس جو کل تک ایک منصوبہ تھا آج حقیقت میں ہمارے سامنے ہے، یہ سروس اہل ریاض اور یہاں آنے والوں کے لیے مثالی سہولت فراہم کرے گی۔

واضح رہے کہ ریاض میٹر پہلے مرحلے میں تین روٹس کے لیے سروس شروع کی جا رہی ہے۔

بعدازاں دسمبر کے وسط تک مزید تین روٹس کے لیے سروس شروع کردی جائے گی۔

لاقتصادیہ کے مطابق ذرائع کا کہنا ہے پہلے مرحلے میں العروبہ سے البطحا اور کنگ خالد ایئرپورٹ سے رنگ روڈ عبدالرحمان بن عوف اور شیخ حسن بن حسین تک ہو گا جو مکمل گنجائش کے ساتھ شروع ہو گا۔

میٹرو سروس کا دوسرا مرحلہ جس کا آغاز دسمبر کے وسط میں  کیا جائے گا۔ یہ روٹ شاہ عبداللہ روڈ سے شاہ عبدالعزیز سٹی تک مسافروس کو سفر کی سہولت فراہم کرے گا۔

واضح رہے اپریل 2012 میں سعودی کابینہ نے ریاض میں ٹریفک کے رش کوکنٹرول کرنے کے لیے میٹرو منصوبے کی منظوری دی تھی جس کے بعد منصوبے پر کام شروع کردیا گیا تھا۔