جوہانسبرگ میں شدید بارش، پاکستان اور جنوبی افریقہ کے درمیان آخری ٹی20 میچ منسوخ

پاکستان اور جنوبی افریقہ کے درمیان تیسرا اور آخری ٹی20 میچ بارش کے باعث منسوخ کردیا گیا ہے، اسی طرح سیریز میزبان ملک نے 0-2 سے اپنے نام سے کرلی۔
دونوں ٹیموں کے درمیان تین ٹی20 میچوں پر مشتمل سیریز کا آخری میچ سنیچر کو جونسبرگ میں کھیلا جانا تھا، تاہم شدید بارش اور گراؤنڈ گیلا ہونے کے باعث امپائرز نے میچ منسوخ کرنے کا اعلان کیا۔

میچ دیکھنے کے لیے تماشائیوں کی بڑی تعداد جوہانسبرگ کے وانڈررز سٹیڈیم میں موجود تھی، تاہم خراب موسم کے باعث میچ شروع ہی نہ ہو سکا اور انہیں مایوس لوٹنا پڑا۔
واضح رہے کہ جمعے کو کھیلا گیا ٹی20 سیریز کا پہلا میچ جنوبی افریقہ نے 11 رنز سے جیت لیا تھا جبکہ جمعے کو کھیلے گئے دوسرے میچ میں پاکستان کو سات وکٹوں سے شکست ہوئی۔
اس طرح جنوبی افریقہ کی ٹیم نے یہ ٹی20 سیریز 0-2 سے جیت لی۔ دونوں ٹیموں کے درمیان تین ایک روزہ میچوں کی سیریز منگل 17 دسمبر سے شروع ہو رہی ہے۔
منگل 17 دسمبر کو پہلا ون ڈے میچ بولینڈ بینک پارک میں کھیلا جائے گا جبکہ جمعرات 19 دسمبر کو دونوں ٹیمیں نیولینڈز کیپ ٹاؤن میں مدمقابل ہوں گی۔
پاکستان اور جنوبی افریقہ کے درمیان تیسرا اور آخری ایک روزہ میچ اتوار 22 دسمبر کو جوہانسبرگ کے وانڈررز سٹیڈیم میں کھیلا جائے گا۔
دونوں ٹیموں کے درمیان دو ٹیسٹ میچوں پر مشتمل سیریز کا پہلا میچ جمعرات 26 دسمبر سے سینچورین کے سپرسپورٹ پارک میں شروع گا۔
دونوں ٹیموں کے درمیان سیریز کے دوسرے ٹیسٹ میچ کا آغاز جمعہ تین جنوری 2025 سے نیولینڈز کیپ ٹاؤن میں ہوگا۔