مراکش میں شادی کے کھانے سے 152 افراد زہرخورانی کا شکار

مراکش میں شادی کی تقریب کے کھانے سے 152 افراد زہرخورانی کا شکار ہوگئے۔ ادارہ پراسیکیوشن نے زہرخورانی کے واقعے کی تحقیقات کا حکم دیا ہے۔

عکاظ کےمطابق مراکش کے صوبے’الجدیدہ‘ میں شادی کی تقریب میں مدعو مہمانوں کی حالت اس وقت بگڑنا شروع ہوئی جب انہوں نے مرغی کے گوشت سے بنی ایک مخصوص علاقائی ڈش کھائی۔

مہمانوں میں سے بعض لوگوں کی طبیعت کھانا کھاتے ہی خراب ہونا شروع ہو گئی جنہیں قے، پیٹ میں شدید درد اور موشن کی شکایت تھی۔

جن مہمانوں کی طبیعت کافی خراب تھی انہیں شادی ہال سے براہ راست ہسپتال منتقل کردیا گیا۔

مہمانوں کی حالت مزید بگڑ جانے پر میزبان نے ہنگامی امدادی سینٹر کوکال کر دی تاکہ مدد طلب کی جاسکے۔

امدادی یونٹس نے متاثرہ افراد کو علاقے کے مختلف طبی مراکز میں منتقل کیا جہاں انہیں ابتدائی طبی امداد دی گئی۔ کئی کو حالت قدرے بہتر ہونے پر ہسپتال سے فارغ کردیا گیا۔

یاد رہے گزشتہ مئی میں بھی مراکش میں فوڈ پوائزنگ کے ایک واقعہ میں کم از کم 6 افراد ہلاک ہوئے تھے۔