لاس اینجلس: اصطبل سے 25 دہشت زدہ گھوڑوں کا ریسکیو آپریشن

لاس اینجلس میں موجود گھڑ سواری کے مرکز اور اصطبل کی انچارج جینیل گرس نے بتایا ہے کہ ’ارد گرد جنگلات میں بھڑکی آگ سے بچنے کے لیے اصطبل میں موجود 25 گھوڑوں اور دیگر جانوروں کے ساتھ ہمیں فوری طور پر وہاں سے نکلنا پڑا۔‘

فرانسیسی نیوز ایجنسی اے ایف پی کے مطابق اصطبل کی انچارج ہونے کی وجہ سے گرس جانتی تھیں کہ یہ کام کافی پیچیدہ ہوگا، جب انہیں دو درجن سے زیادہ خوفزدہ گھوڑوں کو ریسکیو کرتے ہوئے ان پر قابو رکھنا پڑا۔

علاقے میں 100 میل فی کی رفتار سے تیز ہوائیں انگاروں کو ادھر اُدھر اڑا رہی تھیں، وہاں موجود لوگ آگ سے بچاؤ کے لیے اپنی گاڑیوں میں بیٹھ کر خطرے سے دور نکل گئے۔

جینیل گرس نے بتایا ’لاس اینجلس ایکوسٹرین سینٹر ’گھڑسواری کے مرکز‘ میں گذشتہ ہفتے سیکڑوں جانور لائے گئے تھے جہاں وہ لمحہ بہت مشکل تھا جب ہمیں سینٹر کے اصطبل سے آخری گھوڑا ریسکیو کرنا تھا۔‘

اصطبل کی انچارج کا کہنا تھا کہ ’ہر طرف دھواں پھیلا ہوا تھا، اندھیرے میں دیکھنا مشکل ہو رہا تھا، میں اور میرے ساتھ گھوڑے راستے میں پڑی مختلف اشیاء سے ٹکرا رہے تھے۔‘

’ڈرے ہوئے گھوڑوں کو قابو کرنا اتنا مشکل تھا کہ ایک موقع پر مجھے ڈر تھا کہ یہ جانور آگ کی نذر نہ ہو جائیں اور یہ سوچ کر میرے آنسو نکل آئے۔‘

لاس اینجلس کی آگ کی لپیٹ میں آ کر اب تک کم از کم 16 افراد جان کی بازی ہار چکے ہیں جبکہ خوفناک آگ کے باعث شہر میں بسنے والے ڈیڑھ لاکھ سے زیادہ  افراد کو گھر بار چھوڑنا پڑا۔

لاس ایجنلس کے ایکوسٹرین سینٹر ڈائریکٹر جینی نیوین نے بتایا ’سنیچر کے روز اصطبل میں درجنوں افراد موجود تھے، بڑھتی ہوئی آگ کے پیش نظر انہیں نکلنے کا کہا گیا جب اصطبل میں گھوڑوں کے علاوہ پونی، گدھے اور دیگر پالتو جانوروں نے پناہ لے رکھی تھی۔‘

معروف ٹی وی سٹار پیج جو پیشہ ور اسٹنٹ وومن ہیں وہ کچھ دیر قبل اپنی تین سالہ بیٹی کے ہمراہ اصطبل میں موجود اپنے پونی ’ٹرفلز‘ اور گائے کو دیکھنے یہاں موجود تھیں۔

ٹی وی سٹار نے بتایا کہ ’ناقابل تصور تباہی کے دوران ایکوسٹرین سینٹر ایک محفوظ پناہ گاہ ثابت ہوا لیکن یہ انتہائی خوفناک اور عجیب تجربہ رہا۔‘

ڈائریکٹر جینی نیوین نے بتایا کہ ’جانوروں کو ریسکیو کرنے میں مدد فراہم کرنے والوں نے زبردست کام کیا اور یہ واقعی ایک کمیونٹی کا ہی کام تھا جو حفاظتی اقدام پر عمل ممکن ہوا۔‘

پورے لاس اینجلس میں رضاکار، ویٹرنری ڈاکٹر اور کارکن بے گھر جانوروں کو بچانے اور ان کی دیکھ بھال کرنے میں مصروف ہیں، بہت سے بچائے جانے والے جانوروں میں کچھ زخمی بھی ہیں۔

لاس اینجلس میں اینیمل ویلنس سینٹر کی بانی ایننی ہارولز کا کہنا ہے اس ہولناک صورتحال میں وہ پورا ہفتہ پلک جھپکنے کے برابر بھی آرام نہیں کر سکیں، جھلسی ہوئی عمارتوں کے کھنڈرات سے پالتو جانور ملے ہیں۔

ایننی ہارولز نے بتایا جب آگ نے علاقے کو لپیٹ میں لیا تو میں نے پالتو جانوروں کو اپنے مرکز میں رکھنے کی سوشل میڈیا پر پوسٹ لگائی جس نے کام دکھایا اور لوگ اپنے پالتو جانور یہاں لانے لگے۔  

اینیمل ویلنس سینٹر کی بانی کا کہنا ہے ’جب فائر فائٹرز آگ پر قابو پا لیں گے تب بھی تکلیف کا سامنا کرنا پڑے گا، جو پالتو جانور میں گے ان میں زخمی یا جھلسے ہوئے ہوں گے اور کچھ دھوئیں کے باعث سانس کی دشواری میں مبتلا ہوں گے۔