شاہی مہمانوں کا تیسرا گروپ عمرے کےلیے سعودی عرب پہنچ گیا

سعوددی وزارت اسلامی امور و دعوت و رہنمائی کے زیر اہتمام خادم حرمین شریفین کی ضیافت میں عمرہ ادا کرنے والوں تیسرا گروپ مدینہ منورہ پہنچ گیا۔

وزارت اسلامی امور کے حکام نے مدینہ کے امیر محمد بن عبدالعزیز ایئرپورٹ پر مہمانوں کا خیرمقدم کیا۔

سرکاری خبررساں ادارے ایس پی اے کے مطابق سال رواں 2024 کے دوران شاہی ضیافت میں عمرہ کرنے والوں کا پہلا اور دوسرا گروپ مکہ مکرمہ میں عمرہ اور مدینہ منورہ میں مسجد نبوی کی زیارت مکمل کرکے واپس جاچکا ہے۔

وزارت اسلامی امور کا کہنا ہے’ شاہی ضیافت میں عمرہ کرنے والے تیسرے گروپ میں 250 افراد شامل ہیں ان کا تعلق 18 افریقی ملکوں سے ہے۔‘  

شاہی مہمان مصر، مراکش، تیونس الجزائر، مالی، سینیگال، کیمرون، چاڈ، کینیا، نائیجریا، یوگنڈا، جنوبی افریقہ، مڈغاسکر، ایتھوپیا، ماریشش، گنی، موزمبیق اورموریطانیہ سے پہنچے ہیں۔

وزارت اسلامی امور نے خادم حرمین شریفین کے مہمانوں کے لیے مکہ مکرمہ اور مدینہ منورہ میں قیام کے دوران عمرہ و زیارت کا مکمل پروگرام تیار کیا ہے۔

اس پروگرام کے تحت 66 ملکوں کے ایک ہزار زائرین کی چار گروپوں میں میزبانی کی جائے گی۔