ریستوران میں بلی یا کتے کی موجودگی پر 2 ہزار ریال جرمانہ ہو گا، فوڈ اتھارٹی

سعودی فوڈ اینڈ ڈرگ اتھارٹی کی جانب سے خلاف ورزیوں پر عائد کیے جانے والے جرمانوں کے حوالے سے تجاویز پیش کی ہیں جن کے مطابق کچن، ریستوران وغیرہ میں بلی یا کتے کی موجودگی پر 2 ہزارریال جرمانہ عائد کیا جائے گا۔

اتھارٹی نے فوڈ سروسز یا کیٹرنگ کے حوالے سے کسی بھی غیرقانونی تجارتی سرگرمی پر 50 ہزار ریال جرمانہ عائد کرنے کے لیے ضوابط مرتب کر لیے ہیں۔

اخبار 24 کے مطابق فوڈ اینڈ ڈرگ اتھارٹی نے غذائی نظام پرعمل نہ کرنے والوں کے خلاف تادیبی کارروائی کرنے کے حوالے سے تجاویز پر رائے حاصل کرنے کے لیے سروے کا بھی اہتمام کیا ہے۔

ضوابط کا مقصد غذائی نظام کی خلاف ورزی کرنے اور پرمٹ حاصل کیے بغیر اشیائے خور و نوش کے میدان میں غیرقانونی تجارتی سرگرمیوں کے رجحان کا خاتمہ کرنا اور صحت عامہ کا تحفظ ہے۔

تجاویز میں مزید کہا گیا ہے کہ اشیائے خور و نوش کے میدان میں کام کرنے والے تجارتی ادارے کا لائسنس ایکسپائر ہونے یا لائسنس جاری نہ کرانے پر 5 ہزار ریال تک جرمانہ عائد کیا جائے گا۔

ضوابط کے مطابق ریستوران وغیرہ میں صفائی کا خیال نہ رکھنے پر زیادہ سے زیادہ 4 ہزار جبکہ کم سے کم 200 ریال تک جرمانہ مقرر کیا گیا ہے۔

علاوہ ازیں دکان یا ریستوران وغیرہ میں سیوریج لائن کی خرابی کی صورت میں گندا پانی داخل ہونے پر 4 ہزار ریال تک جرمانہ مقرر ہے۔

دکان یا ہوٹل وغیرہ میں حشرات الارض کی موجودگی پر زیادہ سے زیادہ 2 ہزار ریال تک جرمانہ ہوگا۔