فیکٹ چیک: بابر اعظم کا فون گم ہو گیا، مگر یہ ’چور اور پولیس دونوں جعلی ہیں‘

پاکستان کرکٹ ٹیم کے سٹار بیٹر بابر اعظم سوشل میڈیا پر بیٹنگ کے بجائے اپنا موبائل فون گم ہو جانے کی وجہ سے موضوع بحث ہیں۔

بابر اعظم نے جمعرات کو سماجی رابطے کی ویب سائٹ ایکس پر اپنی پوسٹ میں اطلاع دی کہ اُن کا موبائل کھو گیا ہے۔

بابر اعظم نے اپنی پوسٹ میں لکھا کہ ’میرا فون اور کونٹیکٹس کھو گئے ہیں۔ مجھے جیسے ہی فون ملے گا میں سب سے رابطہ کروں گا۔‘

اس پوسٹ کے جواب میں پنجاب پولیس سے منسوب ایک جعلی ایکس اکاؤںٹ نے پوسٹ کی کہ بابر اعظم کا فون چرانے والا چور پکڑا گیا ہے۔

یہ پوسٹ ایکس سمیت دیگر سوشل میڈیا پلیٹ فارمز پر بھی وائرل ہے۔

اُردو نیوز کے فیکٹ چیک کرنے پر معلوم ہوا کہ پنجاب پولیس سے منسوب ایکس پر ایک جعلی اکاؤنٹ  ہے اور سلاخوں کے پیچھے کھڑے جس شخص کی تصویر لگائی گئی ہے وہ یوٹیوبر اور اداکار اِفی رضا ہیں۔

اِفی رضا نے گزشتہ سال جولائی میں اپنی پوسٹ کے جواب میں انکشاف کیا تھا کہ اُن کی سلاخوں کے پیچھے کھڑے ہونے والی تصویر کسی ڈرامے یا فلم کی شوٹنگ کی تصویر ہے۔

دوسری جانب بابر اعظم کی پوسٹ کے جواب میں صارفین کے تبصرے بھی جاری ہیں۔

سلمان آصف اپنی پوسٹ میں لکھتے ہیں کہ ’ٹیسٹ میں نمبر چار کی رینکنگ گم ہو گئی، ون ڈے میں تیسری پوزیشن گم ہو گئی، ٹی20 میں اوپننگ گم ہو گئی اور اب موبائل بھی گم ہو گیا۔‘

عروج جاوید نے اپنی پوسٹ میں لکھا کہ ’وہ کتنا خوش نصیب ہوگا جس کو بابر کا موبائل ملا ہوگا۔‘

ایک اور صارف نے طنز کرتے ہوئے پوسٹ میں لکھا ’اس کو فورم بولتے ہیں موبائل نہیں۔‘

ایکس ہینڈل ٹریو فلیئر نے لکھا کہ ’فون گم ہو جانا تو بڑی بات نہیں ہے، بس اپنی خود اعتمادی نہ گم ہونے دیں۔ پاکستان آپ کے ساتھ کھڑا ہے۔‘