لائیو: حکومت نیشنل کرپٹو کونسل کے قیام پر غور کرے گی، وزیر خزانہ

یہ پیج مزید اپ ڈیٹ نہیں کیا جا رہا۔

اہم نکات:

•  بنگلہ دیش، نیوزی لینڈ میچ کے دوران گراؤنڈ میں داخل ہونے والے شہری کے خلاف مقدمہ

• مصطفیٰ عامر قتل کیس، ملزم کا ریمانڈ نا دینے والے جج سے اختیارات واپس لینے کی سفارش

• آسٹریلیا اور جنوبی افریقہ کے درمیان میچ بارش کے باعث منسوخ

• ملک کے بیشتر اضلاع میں بارش اور پہاڑوں پر برفباری

• لاہور ہائیکورٹ میں ملازمت سے برطرف شخص نے خود کو آگ لگا لی 

حکومت نیشنل کرپٹو کونسل کے قیام پر غور کرے گی: وزیر خزانہ

وفاقی وزیر خزانہ سینیٹر محمد اورنگزیب کی زیر صدارت منگل کو ڈیجیٹل اثاثوں  سے متعلق اعلیٰ سطح کا اجلاس ہوا۔

وزارت خزانہ کی جانب سے جاری اعلامیے کے مطابق اجلاس میں کرپٹو کرنسی کے عالمی رجحانات، ضوابط اور پاکستان کی معیشت پر اثرات پر تفصیلی تبادلہ خیال کیا گیا۔

اجلاس کو بتایا گیا کہ حکومت نیشنل کرپٹو کونسل کے قیام پر غور کرے گی، جو پالیسی سازی اور ضابطہ سازی میں معاونت فراہم کرے گی۔

نیشنل کرپٹو کونسل حکومتی اداروں، ریگولیٹری اتھارٹیز اور انڈسٹری ماہرین پر مشتمل ہوگی۔

کرپٹو کونسل عالمی معیار کے ضوابط کی تشکیل اور بین الاقوامی ڈیجیٹل معیشت میں شمولیت کو یقینی بنائے گی۔

وزیر خزانہ نے کہا کہ ڈیجیٹل اثاثوں میں سرمایہ کاری اور جدید رجحانات کے فروغ کے لیے متوازن حکمت عملی اپنانا ہوگی۔

وزیر خزانہ نے ڈیجیٹل اثاثوں کے لیے مؤثر، شفاف اور عالمی معیار کے مطابق فریم ورک بنانے پر زور دیا اور ایف اے ٹی ایف گائیڈ لائنز کے مطابق ڈیجیٹل اثاثوں کے ضابطہ کار کو یقینی بنانے کی ہدایت کر دی۔

محمد اورنگزیب نے ڈیجیٹل کاروبار کے فروغ اور شفاف قانونی فریم ورک کی تشکیل پر زور دیا۔

انہوں نے ہدایت کی کہ  ریگولیٹری تقاضوں، مالی تحفظ اور شفافیت کو یقینی بنانے کے لیے جامع فریم ورک تیار کیا جائے۔

پاکستان اور ازبکستان امن و علاقائی روابط کے لیے مشترکہ وژن رکھتے ہیں: شہباز شریف

وزیراعظم شہباز شریف آذربائیجان کا دورہ ختم کرکے ازبکستان کے دو روزہ دورے پر باکو سے تاشقند پہنچ گئے ہیں۔

ازبکستان کے وزیراعظم عبداللہ عاریپوف اور ازبک وزیرِ خارجہ بختیار سیدوف سمیت اعلی سفارتی و سرکاری اہلکاروں نے وزیراعظم کا استقبال کیا۔

وزیراعظم محمد شہباز شریف نے تاشقند میں یادگارِ آزادی کا دورہ کیا، جہاں انہوں نے کہا کہ ’پاکستان اور ازبکستان امن، خوشحالی اور علاقائی روابط کے لیے مشترکہ وژن رکھتے ہیں۔ یہ دورہ ہماری مشترکہ اقدار اور روشن مستقبل کے لیے مل کر کام کرنے کی ضرورت کے عزم کا اعادہ ہے۔‘

دفتر خارجہ نے کہا ہے کہ وزیراعظم شہباز شریف ازبک صدر شوکت مرزیوئیف کی دعوت پر آج 25 سے 26 فروری تک ازبکستان کا دو روزہ دورہ کر رہے ہیں۔

بنگلہ دیش، نیوزی لینڈ میچ کے دوران گراؤنڈ میں داخل ہونے والے شہری کے خلاف مقدمہ

راولپنڈی میں بنگلہ دیش اور نیوزی لینڈ کے میچ کے دوران گراؤنڈ میں داخل ہونے والے شہری کے خلاف مقدمہ درج کر لیا گیا ہے۔

ایف آئی آر کے متن کے مطابق میچ کے دوران شام سوا آٹھ بجے کے قریب عبدالقیوم نامی شخص جان بوجھ کر سکیورٹی پروٹوکول کی خلاف ورزی کرتے ہوئے گراؤنڈ میں داخل ہوا۔

مصطفیٰ عامر قتل کیس کے ملزم کا ریمانڈ نہ دینے والے جج سے انتظامی اختیارات واپس  لینے کی سفارش

مصطفیٰ عامر کے قتل کیس میں سندھ ہائی کورٹ نے مصطفیٰ عامر قتل کیس کے ملزم کا ریمانڈ نہ دینے والے انسدادِ دہشت گردی کی عدالت کے منتظم جج سے انتظامی اختیارات واپس لینے کی سفارش کردی ہے۔

جسٹس ظفر راجپوت کی سربراہی میں دو رکنی بینچ کا تفصیلی فیصلہ جاری کر دیا گیا۔

قائم مقام پراسکیوٹر جنرل سندھ منتظر مہدی کے مطابق دو رکنی بینچ نے ریکارڈ ٹمپرنگ کے الزامات کے بعد ایڈمنسٹریٹر جج سے اختیارات واپس لینے کی سفارش کردی ہے۔

ان کا کہنا تھا کہ ایسے جج کو عہدے پر رہنے کا اختیار نہیں ہے۔

مصطفیٰ عامر قتل کیس میں ملزم ارمغان کا مبینہ سہولت کار پولیس افسر گرفتار

مصطفیٰ عامر قتل کیس میں ملزم ارمغان کے مبینہ سہولت کار اے ایس آئی کو اینٹی وائلنس کرائم سیل (اے وی سی سی) نے حراست میں لیا ہے۔

دوسری طرف اداکار ساجد حسن کے بیٹے ملزم ساحر حسن کو عدالت میں پیش کر دیا گیا۔

سپیشل انویسٹی گیشن یونٹ (ایس آئی یو) نے ملزم کے جسمانی ریمانڈ میں توسیع کی استدعا کرتے ہوئے کہا ہے کہ ملزم سے تفتیش مکمل نہیں ہوئی ہے جسمانی ریمانڈ میں پانچ روز کی توسیع کی جائے۔

عدالت نے ایس آئی یو کے جسمانی ریمانڈ میں توسیع کی استدعا مسترد کردی اور ساحر حسن کو عدالتی ریمانڈ پر جیل بھیج دیا۔

مصطفیٰ عامر قتل کیس کے بارے میں مزید پڑھنے کے لیے یہاں کلک کریں

آسٹریلیا اور جنوبی افریقہ کے درمیان میچ بارش کے باعث منسوخ

چیمپیئنز ٹرافی میں راولپنڈی میں آسٹریلیا اور جنوبی افریقہ کے درمیان میچ بارش کی وجہ سے منسوخ کر دیا گیا ہے۔

آسٹریلیا اور جنوبی افریقہ کے درمیان ٹاس ڈیڑھ بجے ہونا تھا اور میچ کا ٹائم دو بجے تھا لیکن بارش کے باعث پچ کو ڈھانپ دیا گیا تھا۔

راولپنڈی کے پنڈی کرکٹ سٹیڈیم میں دونوں ٹیموں کا ٹورنامنٹ میں دوسرا میچ تھا۔ چیمپئنز ٹرافی میں اب تک دونوں ٹیمیں ناقابلِ شکست ہیں۔

مہاجر قومی موومنٹ کے چیئرمین آفاق احمد کو رہا کردیا گیا

مہاجر قومی موومنٹ کے چیئرمین آفاق احمد کو رہا کردیا گیا جنہیں ٹینکرز جلانے کے تین مختلف مقدمات میں نامزد کیا گیا تھا۔۔

دو مقدمات میں ضمانت کے بعد ایک نئے مقدمے کے انداراج کی وجہ سے انہیں جیل میں مزید وقت گزارنا پڑا۔

محسن نقوی سے روس کے سفیر کی ملاقات، انسداد منشیات پر تعاون بڑھانے پر گفتگو

وفاقی وزیر داخلہ محسن نقوی سے روس کے سفیر البرٹ پی خوریف نے ملاقات کی جس میں باہمی دلچسپی کے امور اور دوطرفہ تعلقات کے فروغ کے حوالے سے تبادلہ خیال کیا گیا۔

منگل کو وزارت داخلہ کی جانب سے جاری پریس ریلیز کے مطابق ملاقات میں انسداد دہشت گردی و منشیات کے سلسلے میں باہمی تعاون بڑھانے پر بات چیت کی گئی۔

دونوں ممالک کے درمیان انسداد دہشت گردی ڈائیلاگ کو فعال کرنے پر بھی  اتفاق کیا گیا۔

محسن نقوی نے کہا کہ دہشت گردی ایک بین الاقوامی چیلنج ہے اور کثیر الجہتی مشترکہ اقدامات سے ہی اس ناسور پر قابو پایا جاسکتا ہے۔

موٹروے ایم ون غازی انٹرچینج کے قریب پر بس حادثے کا شکار، دو افراد ہلاک

موٹروے ایم ون غازی انٹرچینج کے قریب بس حادثے کا شکار ہو گئی جس کے نتیجے میں دو افراد ہلاک ہو گئے۔

ترجمان موٹروے پولیس کے مطابق بس بونیر سے راولپنڈی کی جانب جا رہی تھی۔ حادثے کے نتیجے میں تین افراد شدید  زخمی ہوئے جنہیں ہسپتال منتقل کیا گیا، لیکن زخموں کی تاب نہ لاتے ہوئے ہسپتال میں چل بسے۔

ابتدائی معلومات کے مطابق حادثہ ڈرائیور کی غفلت لاپرواہی  کی وجہ سے پیش آیا۔

ملک کے بیشتر اضلاع میں بارش اور پہاڑوں پر برفباری

محکمہ موسمیات کے مطابق ملک کے بیشتر اضلاع میں مطلع ابر آلود رہنے کے علاوہ گرج چمک کے ساتھ بارش اور پہاڑوں پر برفباری کا امکان ہے۔

 اسلام آباد اور گردونواح میں با رش کا سلسلہ جاری ہے جس سے شہر کا موسم خوشگوار ہو گیا ہے۔

خیبرپختونخوا کے بیشتر اضلاع میں تیز ہواؤں کے ساتھ بارش کا امکان ہے، جبکہ پنجاب کے بیشتراضلاع میں موسم سرد اور مطلع جزوی ابر آلود رہنے کی پیش گوئی کی گئی ہے۔ پنجاب کے چند مقامات پر موسلادھار بارش اور ژالہ باری کی بھی توقع ہے۔

مری، گلیات اور گردونوا ح میں برفباری اور مطلع ابر آلود رہنے کی توقع ہے۔ گلگت بلتستان میں چترال اور گردو نواح میں برفباری جاری ہے۔

سندھ کے بیشتر اضلاع میں موسم خشک رہنے کا امکان ہے۔ کوئٹہ سمیت بلوچستان کے مختلف علاقوں میں بارش وقفے وقفے سے جاری ہے۔ آئندہ چوبیس گھنٹوں کے دوران شمال مشرقی علاقوں میں مزید بارشوں کی پیش گوئی ہے۔

لاہور ہائیکورٹ میں ملازمت سے برطرف شخص نے خود کو آگ لگا لی

لاہور ہائیکورٹ میں ملازمت سے برطرفی پر اپیل دائر کرنے والے شخص نے خود کو آگ لگا لی۔

آصف جاوید نامی اس شخص نے نوکری کی برطرفی کے خلاف اپیل دائر کر رکھی تھی۔

پولیس اہلکار نے موقع پر آگ بھجائی اور ریسکو ٹیم نے طبی امداد کے لیے قریبی ہسپتال منتقل کر دیا۔

سائل آصف جاوید کا کیس جسٹس شجاعت علی خان کی عدالت میں زیر سماعت ہے۔

پاکستان میں رمضان 2 مارچ سے شروع ہونے کا امکان

سپارکو نے کہا ہے کہ رمضان کا چاند 28 فروری کو نظر آنا مشکل ہے اور پاکستان میں رمضان 2 مارچ سے شروع ہونے کا امکان ہے۔

ترجمان سپارکو کے مطابق 28 فروری کو غروب آفتاب کے وقت چاند کی عمر 12 گھنٹے اور بلندی 5 ڈگری ہو گی اور چاند کی کم بلندی اور فاصلے کی وجہ سے ہلال کا نظر آنا مشکل ہے۔

سپارکو کے مطابق شوال کا چاند 30 مارچ کو متوقع ہے، جبکہ عید الفطر 31 مارچ کو ہوسکتی ہے۔

سعودی عرب میں 28 فروری کو چاند نظر آسکتا ہے اور رمضان یکم مارچ سے شروع ہوگا۔

مستونگ میں قومی شاہراہ کو ٹریفک کے لیے بلاک کر دیا گیا

مستونگ میں لاپتا میر ظہور احمد سمالانی  کی بازیابی کے لیے نواب ہوٹل مستونگ کے مقام پر قومی شاہراہ کو ٹریفک کے لیے بلاک کر دیا گیا۔

سمالانی قومی تحریک کے مرکزی چیئرمین قبائلی رہنما نواب میر احمد چلتن وال سمالانی کے سربراہی میں روڈ پر دھرنا دیا گیا ہے۔