21 سال کا سفر اختتام پذیر، معروف آڈیو وڈیو کالنگ ایپ ’سکائپ‘ کو بند کرنے کا فیصلہ

امریکی ٹیکنالوجی کمپنی مائیکروسافٹ نے کہا ہے کہ وہ آن لائن آڈیو اور ویڈیو ایپلی کیشن سکائپ کو ریٹائر کر رہا ہے۔ مائیکروسافٹ نے سنہ 2011 میں سکائپ کو خریدا تھا۔

فرانسیسی خبر رساں ادارے اے ایف پی کے مطابق سکائپ سپورٹ نے جمعے کو ایکس پر ایک پوسٹ میں کہا کہ ’مئی 2025 کے آغاز سے سکائپ دستیاب نہیں ہو گا۔‘

انہوں نے صارفین کو اس (آن لائن آڈیو اور ویڈیو سروس) کے مزید استعمال کے لیے مائیکروسافٹ ٹیمز پلیٹ فارم میں سائن ان کرنے کی ہدایت کی ہے۔

سکائپ کی بنیاد سنہ 2003 میں نکلاس زینسٹروم اور جانس فریس نے ایسٹونیا میں رکھی تھی۔ اور اس نے کمپیوٹرز کے درمیان مفت وائس کالز اور لینڈ لائنز اور موبائل فونز پر کالز کے لیے سستی شرحوں کی پیشکش کر کے انٹرنیٹ مواصلات میں انقلاب برپا کر دیا تھا۔

آنے والے برسوں میں جیسے جیسے انٹرنیٹ کی رفتار میں بہتری آئی، سکائپ نے ویڈیو کالز، فوری پیغام رسانی، فائل شیئرنگ، اور گروپ کمیونیکیشن جیسے فیچرز بھی متعارف کرا دیے۔

سنہ 2005 میں سکائپ کے پانچ کروڑ رجسٹرڈ صارفین تھے جو اس کی عالمی سطح پر مقبولیت کو ظاہر کرتا ہے۔

آن لائن نیلامی کی سائٹ ای بے نے سنہ 2005 میں سکائپ کو تقریباً دو ارب 60 کروڑ ڈالر میں خرید لیا لیکن 2009 میں سرمایہ کاروں کے ایک گروہ کو کو اس کے اکثریتی حصص فروخت کر دیے، جنہوں نے اسے مائیکروسافٹ کو بیچ دیا۔

حالیہ برسوں میں خاص طور پر سمارٹ فون کے عروج کے بعد، سکائپ اپنے نئے حریفوں جیسے واٹس ایپ اور زوم کے ساتھ ساتھ مائیکروسافٹ ٹیمز کے مقابلے میں اپنی جگہ برقرار رکھنے میں ناکام رہا۔

مائیکروسافٹ 365 کے صدر جیف ٹیپر نے سی این بی سی سے بات کرتے ہوئے کہا کہ ’ہم نے سکائپ سے بہت کچھ سیکھا ہے۔ لیکن ہم نے محسوس کیا کہ اب وقت آ گیا ہے کیونکہ ہم مارکیٹ کے لیے، اپنے صارفین کے لیے سادہ ہو سکتے ہیں، اور ہم صرف ٹیمز پر توجہ مرکوز کر کے مزید اختراعات کو تیزی سے فراہم کر سکتے ہیں۔‘