’محمد شامی مجرم ہے‘، میچ کے دوران روزہ نہ رکھنے پر انڈین مذہبی رہنما کی تنقید

انڈیا کے معروف کرکٹر محمد شامی چیمپئنز ٹرافی کے ایک میچ کے دوران سافٹ ڈرنگ پینے پر تنقید کی زد میں ہیں۔

دو مارچ کو آئی سی سی چیمپئنز ٹرافی 2025 کے انڈیا اور نیوزی لینڈ کے درمیان گروپ میچ کے دوران  محمد شامی سافٹ ڈرنک پیتے ہوئے دکھائی دیے۔

انڈیا تو یہ میچ جیت گیا لیکن محمد شامی رمضان میں سرعام سافٹ ڈرنک پینے پر تنقید کی زد میں آگئے۔

کئی ایک کرکٹ فینز محمد شامی پر رمضان میں روزے کے دوران سرعام سافٹ ڈرنک پینے پر تنقید کر رہے ہیں۔

کرکٹ فینز کا کہنا ہے کہ محمد شامی کو اس طرح سرعام پانی نہیں پینا چاہیے تھا۔

اس معاملے پر آل انڈیا مسلم جماعت کے صدر مولانا شہاب الدین رضوی بریلوی کا ایک بیان بھی سامنے آیا ہے جس میں انہوں نے محمد شامی کو ’مجرم‘ قرار دیا ہے۔

انڈین نیوز ایجنسی اے این آئی سے بات کرتے ہوئے مولانا شہاب الدین رضوی بریلوی کا کہنا تھا کہ ’ ارکان اسلام میں توحید، نماز، روزہ، حج اور زکوت شامل ہیں، ان میں سے اہم ترین فرض روزہ ہے، روزے کو اسلام نے اپنے تمام پیروکاروں پر فرض قرار دیا ہے۔‘

وہ مزید کہتے ہیں کہ ’اگر کوئی بھی صحت مند، عاقل بالغ مرد یا عورت روزہ نہیں رکھتا ہے تو وہ گناہ عظیم کا ارتکاب کرتا ہے، اور ان سے اس پر خدا کی بارگاہ میں پوچھ گچھ ہو گی۔‘

’انڈیا کی مشہور شخصیت محمد شامی صاحب نے کرکٹ کے میچ کے دوران پانی پیا یا اور کوئی چیز پی لی، تمام لوگ انہیں دیکھ رہے تھے، جب وہ کھیل رہے ہیں تو اس کا مطلب ہے وہ صحت مند ہیں، تندرست ہیں، توانا ہیں۔‘

ان کا اپنی بات جاری رکھتے ہوئے مزید کہنا تھا کہ ’انہوں نے روزے کی حالت میں پانی پیا، ساری دنیا نے دیکھا، ان کی وجہ سے ایک غلط پیغام عوام میں گیا، روزہ نہ رکھ کر انہوں نے گناہ کا ارتکاب کیا، شریعت کی نظر میں وہ مجرم ہیں، وہ خدا کی بارگاہ میں گناہگار ہیں، خدا کے ہاں انہیں جوابدہ ہونا پڑے گا۔‘