لائیو: رواں برس 36 ارب ڈالر کی ترسیلات زر پاکستان آئیں گی، وفاقی وزیر خزانہ

اہم نکات

• رواں برس 36 ارب ڈالر کی ترسیلات زر پاکستان آئیں گی، وفاقی وزیر خزانہ

• سپریم کورٹ میں جمع کرائے گئے 190 ملین پاؤنڈ یونیورسٹی پر خرچ ہوں گے

• اپوزیشن قیدی نمبر 420 کی رہائی کے مطالبے پر سیاست کر رہی ہے: بلاول بھٹو

• پنجاب میں ٹیکس رولز میں ترمیم، کسانوں پر 45 فیصد انکم ٹیکس عائد

• پنجاب میں نیا بلدیاتی نظام، لاہور کا صوبائی دارالحکومت کا سٹیٹس ختم

خیبر پختونخوا کی صورتحال پر اسلام آباد میں ن لیگ اور پیپلز پارٹی کا مشاورتی اجلاس

اسلام آباد میں گورنر خیبر پختونخوا فیصل کریم کنڈی کی رہائشگاہ پر حکمران جماعت پاکستان مسلم لیگ نواز اور پاکستان پیپلزپارٹی کے رہنماؤں کے مشترکہ اجلاس میں خیبر پختونخوا کی مجموعی صورتحال پر مشاورت کی گئی ہے۔

جاری کیے گئے بیان کے مطابق اجلاس میں خیبر پختونخوا میں پائیدار امن سمیت صوبہ کی مجموعی ترقی کیلئے مشترکہ جدوجہد و لائحہ عمل طے کرنے پر اتفاق کیا۔

بیان میں کہا گیا ہے کہ وزیراعظم شہباز شریف اور چیئرمین پیپلزپارٹی بلاول بھٹو زرداری کی ہدایت پر اجلاس میں دونوں جماعتوں کے رہنماؤں نے خیبر پختونخوا میں بدامنی، معاشی بحران اور سیاسی عدم استحکام پر تشویش کا اظہار کیا۔

رواں برس 36 ارب ڈالر کی ترسیلات زر آئیں گی: وفاقی وزیر خزانہ

وفاقی وزیر خزانہ محمد اورنگزیب نے کہا ہے کہ فروری میں پاکستان میں ریکارڈ تین ارب 10 کروڑ ڈالر کی ترسیلات زر آئی ہیں اور اس وقت ہمارا تخمینہ ہے کہ اس برس 36 ارب ڈالر کی ترسیلات زر آئیں گی۔

منگل کو اسلام آباد میں وفاقی وزیر اطلاعات عطا تارڑ کے ہمراہ پریس کانفرنس کرتے ہوئے انہوں نے کہا کہ ہم بیرون ملک کام کرنے والے پاکستانیوں کے شکرگزار ہیں کہ انہوں نے ترسیلات زر ملک میں بھیجیں۔

آئی ایم ایف پروگرام پاکستان کی ترقی کے لیے اہم ہے: وزیراعظم شہباز شریف

وزیراعظم شہباز شریف نے کہا ہے کہ آئی ایم ایف پروگرام پاکستان کی ترقی کے لیے اہم ہے۔

انہوں نے منگل کو وفاقی کابینہ کے اجلاس سے خطاب میں کہا کہ اس وقت آئی ایم ایف کا مشن پاکستان آیا ہوا ہے اور ہمارے وزیر خزانہ اور ان کی ٹیم اور دوسرے وزرا ان کے ساتھ پوری طرح بات کر رہے ہیں۔

وزیراعظم کا کہنا تھا کہ یہ پروگرام ہماری ترقی کے لیے اس لیے اہم ہے کہ ہمارے زرمبادلہ کے ذخائر، مہنگائی، بینکنگ کا نظام، پالیسی ریٹ اور اس میں کمی، یہ تمام چیزیں اس کے ساتھ جڑی ہوئی ہیں۔ لیکن اصل بات پاکستان کی اپنی معاشی ترقی کی ہے، اور اس کے لیے زراعت، صنعت، کامرس، فنانس، آئی ٹی، مائنز اینڈ منرلز اور میرین ٹائم کی وزارتیں انتہائی اہمیت کی حامل ہیں۔

این ایل سی نے خلیجی ممالک کے لیے پہلی کنٹینرائزڈ بحری سروس کا آغاز کر دیا

نیشنل لاجسٹکس کارپوریشن (این ایل سی) نے خلیجی ممالک کے لیے پہلی کنٹینرائزڈ پرچم بردار بحری سروس کا آغاز کر دیا ہے۔

ابتدائی طور پر یہ سروس دو بحری جہازوں کے ساتھ کام کرے گی۔ مستقبل میں متوقع تجارتی ضروریات کو پورا کرنے کے لیے مرحلہ وار توسیع کا منصوبہ بنایا گیا ہے۔

سروس کے اجراء کی مناسبت سے کراچی گیٹ وے ٹرمینل لمیٹڈ پر تقریب کا انعقاد کیا گیا جس میں این ایل سی کے سینیئر حکام، شپنگ لائن اور کاروباری برادری کے نمائندگان نے شرکت کی۔

شاہراہِ قراقرم لوئر کوہستان کے مقام پر لینڈ سلائیڈنگ کے باعث بند

کوہستان پولیس نے کہا ہے کہ چلاس شاہراہِ قراقرم لوئر کوہستان کے مقام پر گذشتہ رات سے لینڈ سلائیڈنگ کے باعث بند ہے۔

اس باعث سینکڑوں مسافروں کی گاڑیاں پھنس چکی ہیں۔ اور ان میں خواتین، بچے اور بزرگ شامل ہیں۔

راولپنڈی تا گلگت زمینی رابطہ منقطع ہو چکا ہے اور دونوں اطراف گاڑیوں کی لمبی قطاریں لگ چکی ہیں۔ مسافروں نے حکومت سے اپیل کی ہے کہ سڑک کو فوراً کھولا جائے۔

سپریم کورٹ میں جمع کرائے گئے 190 ملین پاؤنڈ دانش یونیورسٹی کی تعمیر پر خرچ کریں گے: وزیراعظم

وزیراعظم شہباز شریف نے کہا ہے کہ ہم دانش یونیورسٹی کو اپلائیڈ سائنسز کی یونیورسٹی بنائیں گے اور سپریم کورٹ میں جمع کرائے گئے 190 ملین پاؤنڈ اس کی تعمیر پر خرچ کریں گے۔

منگل کو دانش یونیورسٹی کی سٹیئرنگ کمیٹی کے اجلاس سے خطاب میں انہوں نے کہا کہ ’میں سمجھتا ہوں کہ یہ ایک بہت اہم دن ہے پاکستان کی تاریخ میں کہ 190 ملین پاؤنڈ جو بدترین بدیانتی سے انہوں (عمران خان) نے کہ بجائے حکومت پاکستان کے خزانے میں جمع کراتے ایک ایسے اکاؤنٹ میں بھیج دیے جس کا پاکستان کے خزانے سے کوئی تعلق نہیں تھا۔‘

وزیراعظم کا کہنا تھا کہ ’میں چیف جسٹس صاحب کا شکریہ ادا کرنا چاہتا ہوں۔ انہوں نے کہا کہ یہ پیسہ حکومت پاکستان کا ہے پاکستان کے عوام کا ہے تو یہ فنڈ حکومت جس طرح چاہے عوامی فلاح کے لیے استعمال کر سکتی ہے۔‘

اپوزیشن قیدی نمبر 420 کی رہائی کے مطالبے پر سیاست کر رہی ہے: بلاول بھٹو

پاکستان پیپلز پارٹی کے چیئرمین بلاول بھٹو زرداری نے کہا ہے کہ اپوزیشن صرف قیدی نمبر 420 (عمران خان) کی رہائی کے مطالبے پر سیاست کر رہی ہے، جبکہ عوام کے اصل مسائل پسِ پشت ڈال دیے گئے ہیں۔

منگل کو پارلیمنٹ ہاوس میں میڈیا سے گفتگو میں انہوں نے کہا کہ پاکستان کے عوام چاہتے ہیں کہ سیاستدان ذاتی ایجنڈے کے بجائے مہنگائی، بیروزگاری، معیشت اور امن و امان جیسے مسائل پر توجہ دیں، لیکن بدقسمتی سے اپوزیشن کا پورا زور صرف اپنے لیڈر کی رہائی پر ہے۔

انہوں نے کہا کہ وزیراعظم شہباز شریف کی جانب سے دیے گئے افطار ڈنر میں بھی مہنگائی اور عوامی مسائل پر بات ہوئی، لیکن خیبر پختونخوا کی صوبائی حکومت عوامی مسائل حل کرنے میں کوئی دلچسپی نہیں لے رہی۔ دہشت گردی میں اضافے کے باوجود وہاں کی حکومت غیرسنجیدہ رویہ اپنائے ہوئے ہے۔

پنجاب میں زرعی آمدن پر 45 فیصد تک سالانہ ٹیکس عائد

پنجاب حکومت نے صوبے کے ایگری کلچر انکم ٹیکس رولز میں ترمیم کرتے ہوئے سالانہ 56 لاکھ روپے اور اس سے زائد رقم کمانے والے کسانوں پر 45 فیصد انکم ٹیکس عائد کر دیا ہے۔

نئے رولز کے مطابق سالانہ چھ لاکھ روپے تک آمدن والے کسان کسی بھی طرح کے ٹیکس سے مستثنیٰ ہوں گے۔ جبکہ سالانہ 12 لاکھ روپے کمانے والے کسانوں پر کل آمدن کا 15 فیصد عائد کر دیا گیا ہے۔

نئے رولز کےمطابق 25 ایکڑ تک اراضی رکھنے والے کسانوں پر زمین کا ٹیکس فی ایکڑ 300 روپے کر دیا گیا ہے جبکہ 50 ایکڑ سے زائد زمین رکھنے والوں پر یہ ٹیکس 500 روپے فی ایکڑ ہو گا۔ ساڑھے 12 ایکڑ یا اس سے کم زمین والوں کو اس ٹیکس سے مکمل چھوٹ پہلے بھی حاصل تھی اور اب نئے رولز میں بھی یہ چھوٹ برقرار رکھی گئی ہے۔

آئندہ برس سی ایس ایس امتحان میں تبدیلی نظر آئے گی: وزیر قانون

وفاقی وزیر قانون اعظم نذیر تارڑ نے کہا ہے کہ حکومت کی ذمہ داری بنتی ہے کہ پورے ملک میں یکساں تعلیم ہونی چاہیے۔

انہوں نے منگل کو سینیٹ میں وقفہ سوالات پر اظہار خیال کرتے ہوئے کہا کہ اس وقت بچوں کی بڑی تعداد او اے لیول کی تعلیم حاصل کر رہی ہے، حکومت کی ذمہ داری بنتی ہے کہ پورے ملک میں یکساں تعلیم ہونی چاہیے۔

وفاقی وزیر قانون کا کہنا تھا کہ اس حوالے سے وفاقی حکومت نے احسن اقبال کی صدارت میں ایک کمیٹی تشکیل دی ہے، کمیٹی کی سفارشات کے بعد آئندہ برس سی ایس ایس امتحان میں تبدیلی نظر آئے گی۔

پنجاب کا نیا بلدیاتی نظام: لاہور کا صوبائی دارالحکومت کا سٹیٹس ختم

پاکستان کے صوبہ پنجاب کی اسمبلی نے صوبے کے نئے بلدیاتی نظام کا قانون پیر کو اکثریت رائے سے منظور کر لیا ہے۔

اس نئے نظام کے تحت لاہور کا سپیشل سٹیٹس تبدیل کر دیا گیا ہے۔ اس طرح پنجاب کے بڑے شہروں کی بھی اب ایک سے زیادہ ضلعی ٹاون کارپوریشنز کے تحت نئی حد بندی کی جائے گی۔ اسی طرح یونین کونسل لیول پر چئیرمین اور وائس چئیرمین کے عہدے بھی ختم کر دیے گئے ہیں۔

نئے بلدیاتی نظام کے تحت دو لاکھ سے زائد آبادی والے شہروں میں شہری آبادی کے لیے میونسپل کارپوریشن بنا دی گئی ہے۔ اسی طرح شہر کی ملحقہ آبادیوں کے لیے میونسپل کمیٹی اور دیہی آبادیوں کے لیے تحصیل کونسل بنا دی گئی ہے۔ جبکہ تمام اختیارات ڈپٹی کمشنر اور اسسٹنٹ کمشنرز کے پاس ہوں گے۔

دنیا کے آلودہ ترین ممالک کی فہرست میں پاکستان اور انڈیا سرفہرست

سوئس ایئر کوالٹی مانیٹرنگ فرم آئی کیو ایئر کے مرتب کردہ اعداد و شمار کے مطابق، چاڈ اور بنگلہ دیش سنہ 2024 میں دنیا کے سب سے زیادہ آلودہ ممالک تھے، جہاں سموگ کی اوسط سطح ڈبلیو ایچ او کی گائیڈلائنز سے 15 گنا زیادہ تھی۔

برطانیہ خبر رساں ادارے روئٹرز کے مطابق اس فہرست میں پاکستان کا تیسرا، جمہوریہ ریپبلک کانگو کا چوتھا اور انڈیا کا پانچواں نمبر ہے۔

موسم سرما میں جنوبی ایشیا میں فضائی آلودگی بے تحاشہ بڑھ جاتی ہے۔ رپورٹ کے مطابق نومبر میں پاکستان کے پانچ شہروں میں فضائی آلودگی کی سطح 200 مائیکرون سے اوپر بڑھی ہے۔

آئی کیو ایئر نے کہا ہے کہ صرف آسٹریلیا، نیوزی لینڈ، بہاماس، بارباڈوس، گریناڈا، ایسٹونیا اور آئس لینڈ ڈبلیو ایچ او کی گائیڈلائنز پر پورے اترے ہیں۔

سفیر ڈی پورٹ، پاکستان کا امریکی حکام کے ساتھ معاملہ اٹھانے کا فیصلہ

پاکستان کے دفتر خارجہ نے تصدیق کی ہے کہ ترکمانستان میں تعینات پاکستانی سفیر کے کے احسن وگن کو امریکہ میں داخلے کی اجازت نہیں دی گئی اور انہیں لاس اینجلس ایئرپورٹ سے ڈی پورٹ کر دیا گیا۔

منگل کو ترجمان دفتر خارجہ نے اردو نیوز کو بتایا کہ پاکستانی سفیر ایک نجی دورے پر امریکہ کے لاس اینجلس ایئرپورٹ پہنچے تھے، تاہم امریکی حکام نے انہیں داخلے سے روک دیا اور واپس بھیج دیا گیا۔

’پاکستانی حکام اس معاملے کو امریکی حکام کے ساتھ اٹھا رہے ہیں، تاکہ اس کی وجوہات معلوم کی جا سکیں اور سفارتی سطح پر اس معاملے کو حل کیا جا سکے۔‘

سفارتی ذرائع کے مطابق ’سینیئر پاکستانی سفیر پر امریکہ میں اپنی سابقہ تعیناتی کے دوران انتظامی بدعنوانی کی شکایات تھیں، اور انہی شکایات کی بنیاد پر انہیں امریکہ میں داخل ہونے سے روکا گیا۔‘

نو مئی کے مقدمات: عمران خان کا درخواست ضمانتوں کی جلد سماعت کے لیے لاہور ہائیکورٹ سے رجوع

سابق وزیراعظم اور چیئرمین پاکستان تحریک انصاف عمران خان نے نو مئی کے آٹھ مقدمات میں درخواست ضمانتوں کی جلد سماعت کے لیے لاہور ہائی کورٹ سے رجوع کر لیا ہے۔

انہوں نے منگل کو اپنے وکیل بیرسٹر سلمان صفدر کی وساطت سے متفرق درخواستیں دائر کر دیں۔

عمران خان نے جناح ہاؤس حملہ کیس دیگر مقدمات میں متفرق درخواستیں دائر کیں ہیں۔

سابق وزیراعظم نے کہا ہے کہ ’سیاسی انتقام کے لیے سازش کا الزام کا لگا مقدمات میں نامزد کیا گیا ہے۔ آٹھ مقدمات میں ضمانت کے لیے ہائی کورٹ سے رجوع کیا جس پر 16 جنوری کو سماعت ہوئی تھی۔ پولیس کو نوٹس جاری ہونے کے بعد درخواست ضمانتیں سماعت کے لیے مقرر نہیں ہوئیں۔‘

انہوں نے استدعا کی کہ درخواست کی ضمانتوں کو فوری طور پر سماعت کے لیے مقرر ہونا چاہیے۔