سعودی عرب کے کون سے علاقے اتوار تک بارش اور گرد آلود ہواؤں کی زد میں

موسمیات کے قومی مرکز نے کہا ہے کہ مملکت کے بیشتر علاقوں میں بدھ سے اتوار تک درمیانی سے تیز بارش اور گرد آلود ہواؤں کا امکان ہے۔

عاجل نیوز کے مطابق قومی مرکز کا کہنا ہے جمعرات کو 60 کلومیٹر فی گھنٹے یا اس سے زیادہ رفتار سے گرد آلود ہواؤں کے ساتھ مکہ مکرمہ ریجن میں موسلا دھار بارش کا امکان ہے۔

اس کے اثرات جدہ، رابغ، الجموم، الکامل، بحرۃ، خلیص، اللیث، القنفذہ، طائف، اضم، میسان، العرضیات، المویہ، الخرمہ، رنیہ اور تربہ تک پھیل سکتے ہیں۔

 مدینہ منورہ ریجن کے علاقے خیبر، بدر، المھد، وادی الفرع، الحناکیہ اور مدینہ منورہ شہر تیز ہواؤں سے متاثر ہوں گے۔ یہاں بھی ہوا کی رفتار 60 کلو میٹر فی گھنٹہ تک ہوسکتی ہے جو گردو و غبار کی صورت اختیار کرے گی، موسلا دھار بارش کا امکان ہے۔

 دارالحکومت ریاض، القصیم، حائل، مشرقی ریجن، حدود شمالی، الجوف، الباحہ، جازان کے علاقے ہلکی سے درمیانی بارش سے متاثر رہیں گے اس کے علاوہ یہاں بھی تیز اور گرد آلود ہوائیں بدھ سے اتوار تک متوقع ہیں۔

الباحہ کے حوالے سے موسمیاتی مرکز کا کہنا ہے درمیانی سے شدید بارش سے متاثر ہوسکتا ہے جبکہ تیز ہواؤں اور گرد آلود ہواؤں کا سلسلہ یہاں بھی رہے گا۔ اس کے علاوہ سیلابی صورتحال  اور برف باری کا امکان ہے۔

عسیر ریجن کے زیادہ تر  علاقوں میں درمیانی سے تیز بارش کا امکان  ہے جو جمعے اور سنیچر کو شدت اختیار کرسکتی ہے اس کے علاوہ گرد آلود تیز  ہوائیں چلنے اور سیلابی صورتحال پیش آسکتی ہے۔

جیزان میں بھی درمیانے سے موسلا دھار بارش کے امکانات ہیں۔ گردوغبار، ژالہ باری  ہوسکتی ہے جبکہ نجران کا علاقہ درمیانے درجے کی بارش اور  گردآلود ہواؤں سے متاثر رہے گا۔