اولڈ ٹریفورڈ :جنوبی افریقہ کے ساتھ ٹیسٹ سیریز کے چوتھے اور آخری میچ میں انگلینڈ نے جو روٹ اور بین اسٹوکس کی نصف سنچریوں کی مدد سے 6 وکٹوں کے نقصان پر 260 رنز بنا لئے۔اولڈ ٹریفورڈ میں ہونے والے آخری ٹیسٹ میچ میں انگلینڈ کے کپتان جوروٹ نے ٹاس جیت کر پہلے بیٹنگ کا فیصلہ کیا تو اوپنرز ایلسٹر کک اور کیٹن جیننگز نے ٹیم کو 35 رنز کا آغاز فراہم کیا۔جیننگز نے 17 رنز بنائے اس کے بعد ایلسٹر کک کے ساتھ ٹام ویسٹ آئے اور کھانے کے وقفے تک مزید کوئی وکٹ نہ گرنے دی۔دونوں نے اسکور کو 92 رنز تک پہنچایا لیکن پھر اسی اسکور پر یکے بعد دیگرے دونوں پویلین لوٹ گئے۔92 رنز پر3 وکٹیں گرنے کے بعد جو روٹ اور ڈیوڈ ملان نے چوتھی وکٹ کیلئے 52 رنز بنائے اس سے قبل کہ یہ شراکت مزید خطرناک ثابت ہوتی، مورنے مورکل نے ملان کی اننگز کا خاتمہ کردیا۔جو روٹ اچھی فارم میں نظر آئے اور نصف سنچری اسکور کی تاہم 52 کے انفرادی اسکور پر آوٹ ہوگئے۔اس کے بعد بین اسٹوکس اور بیئراسٹو وکٹ پر یکجا ہوئے اور ٹیم کو بغیر کسی نقصان کے تقریباً دن کے اختتام تک پہنچا لیکن کھیل ختم ہونے سے کچھ دیر ربادا نے اسٹوکس کی وکٹیں بکھیر کر انگلینڈ کو چھٹا نقصان پہنچایا، انہوں نے 58 رنز بنائے۔جب کھیل ختم ہوا تو انگلینڈ نے6 وکٹوں کے نقصان پر 260 رنز بنائے تھے، جنوبی افریقہ کی جانب سے ربادا اور اولیویئر نے دو، دو وکٹیں لیں۔4میچوں کی سیریز میں انگلینڈ کو 2-1 کی برتری حاصل ہے۔
