گایوں کے مسیحاکہاں گئے؟مایاوتی

لکھنؤ۔۔۔۔سابق وزیر اعلیٰ اوربہوجن سماج پارٹی کی صدر مایاوتی نے بھارتیہ جنتا پارٹی پر طنز کرتے ہوئے سوال کیا کہ گائیں تڑپ تڑپ کر مررہی ہیں ، آر ایس ایس اور بی جے پی کے لوگ خاموش کیوں ہیں؟مایاوتی نے اپنے بیان میں کہا کہ بی جے پی حکومت کے گڈ گورننس میں انسانی جان و مال کی کوئی قیمت نہیں ۔ اب تو گئوماتا پر بھی زبردست آفت آگئی ہے۔ بی جے پی حکومت والی ریاستوں میں بدعنوانی کی وجہ سے سرکاری امدادیافتہ گئوشالاؤں میں بھی گائیں بھوکی پیاسی تڑپ تڑپ کر مررہی ہیں ۔ بی ایس پی صدر نے کہا کہ ویسے تو بی جے پی نے رام مندر کی طرح گئو ماتا کو بھی سیاسی اور فرقہ وارانہ مسئلہ بنالیا ہے لیکن گایوں کے تحفظ کے سلسلے میں بی جے پی کے کارکن لاپروا کیوں ہیں؟سابق وزیر اعلیٰ نے کہا کہ بی جے پی حکومت کوگایوں کے تحفظ اور ان سے منسلک منصوبوں میں بدعنوانی پر لگام لگانا چاہئے۔