انوشکا اور ویرات کےلئے عامر کی دعا

دبئی: پاکستانی فاسٹ بولر محمد عامر نے ویرات کوہلی اور انوشکا شرما کو شادی کی مبارکباد دیتے ہوئے دونوں کوبری نظر سے بچنے کی دعا دی ہے۔ہندوستانی اور پاکستانی کرکٹ ٹیم کے کھلاڑی کہنے کو تو روایتی حریف ہیں لیکن سرحد کے دونوں جانب کے کھلاڑی ایک دوسرے کی خوشیوںمیں بھرپور ساتھ دیتے ہیں۔ نئے شادی شدہ جوڑے کو دنیا بھر سے مبارکباد دی جارہی ہے وہیں پاکستانی کرکٹروں نے بھی دونوں کیلئے نیک تمناوں کا اظہار کیا ہے۔ پاکستان کرکٹ ٹیم کے فاسٹ بولر محمد عامر ان دنوں ٹی 10 لیگ کے سلسلے میں دبئی میں موجود ہیں جہاں انہوں نے ایک انٹرویو کے دوران ویرات اور انوشکاکی شادی پر اپنے خیالات کا اظہار کرتے ہوئے کہا کہ میں دونوں کی شادی پر بہت زیادہ خوش ہوں اور ویرات کوہلی کو زندگی کی نئی اننگز پر مبارکباد دیتاہوں۔ جس طرح ویرات کوہلی نے کرکٹ میں کامیابیاں حاصل کی ہیں ،میری دعا ہے کہ ان کی اور انوشکا کی شادی شدہ زندگی بھی اسی طرح کامیاب ہو۔ اس کے علاوہ عامر نے دونوں کےلئے دعا کی کہ دونوں ہر بری نظر سے محفوظ رہیں۔ محمد عامر نے شادی کے موقع پر بھی دونوں کو ٹوئٹر پر بھی مبارکباد دی تھی۔