رئیل میڈرڈ کو چیمپیئنز لیگ سے محروم کر ینگے، نیمارجونیئر

دوحہ: فرانسیسی فٹبال کلب پیرس سینٹ جرمین کے برازیلی کھلاڑی نیمار جونیئر نے چیمپیئنز لیگ کی دفاعی چیمپیئن رئیل میڈرڈ کو خبردار کیا ہے کہ کرسٹیانو رونالڈو اور ان کی ٹیم تیار رہے اس مرتبہ پی ایس جی لیگ میں نئی تاریخ رقم کرے گی۔ چیمپیئنز لیگ کے ناک آوٹ راونڈ کے ڈراز کے نتیجے میں رئیل میڈرڈ اور پی ایس جی کا مقابلہ ہو نے والا ہے ۔ فرانسیسی کلب نے یہی ٹائٹل جیتنے کی کوشش کے طور پر نیمار کو ہسپانوی کلب بارسلونا سے اپنے پاس ٹرانسفر کرنے کے لئے 196ملین پونڈ کا ریکار ڈ سودا کیا تھا۔نیمار بھی اپنی اس ٹرانسفر کو کلب کے لئے نتیجہ خیز بنانے کے خواہاں ہیں اور ان کا یہ انتباہ اسی سلسلے کی کڑی ہے۔ان کا مزید کہنا تھا کہ ہم رئیل میڈرڈ کو نیچا دکھا سکتے ہیں اور پہلی مرتبہ لیگ ٹائٹل جیت کر تاریخ رقم کرنے کی ہر ممکن کوشش کےلئے پوری طرح تیار ہیں۔نیمار نے اس بات پر زور دیا کہ فرنچ لیگ کا کلب چیمپیئنز لیگ کے دفاعی چیمپیئن کو اس سیزن میں اعزاز سے محروم کر سکتا ہے۔ٹیم کے تربیتی کیمپ کے دوران برازیلی اسٹرائیکر نے کہا کہ جب ہمارا مقابلہ ہوگا تو ہم یقینی طور نئی تاریخ رقم کرنے میدان میں اتریں گے۔نیمار نے اعتراف کیا کہ یہ مشکل میچ ہوگا ۔ رئیل میڈرڈ کے کھلا ڑی برسوں سے ایک ساتھ کھیل رہے ہیں اور مسلسل تیسری مرتبہ لیگ ٹائٹل جیتنے کےلئے کوئی کوشش کریں گے لیکن ہم بھی ہر قسم کی صورتحال کا سامنا کرنے کا عزم کئے ہوئے ہیں۔