Sorry, you need to enable JavaScript to visit this website.

امارات ایئر کا نئی ’ڈور ٹو ڈور‘ ایکسپریس کارگو سروس شروع کرنے کا اعلان

پارسل کی ترسیل کا اوسطا وقت 48 گھنٹے ہے (فوٹو، ایکس اکاونٹ)
امارات ایئرنے اپنے صارفین کے لیے ’ایکسپریس کارگو سروس‘ کے آغاز کا اعلان کیا ہے۔ سروس ڈور ٹو ڈور ہوگی جو یکم اپریل 2025 سے شروع کی گئی ہے۔
امارات الیوم اخبار کے مطابق امارات ایئرلائن کے سوشل میڈیا اکاونٹ پر سروس شروع کرنے کے حوالے سے کہا گیا ہے کہ ’ہم مذاق نہیں کررہے، حقیقت میں ایکسپریس کارگو سروس شروع کررہے ہیں۔ دنیا کے کسی بھی کونے سے آپ کا پارسل بحفاظت آپ کے گھر تک پہنچے گا‘۔
امارت ایئرکے شعبہ کارگو کے سینئر نائب صدر بدر عباس کا کہنا تھا کہ ’ایکسپریس کارگو کے حوالے سے ہم نے اعلی معیار کو اپنایا ہے اس ضمن میں مضبوط بنیادوں پر کام کا آغاز کیا اور روایتی لاجسٹک آپریشنز کو از سرنو مرتب کرتے ہوئے اسے بہترین منصوبہ بندی کے ساتھ لانچ کیا‘۔

پارسل ٹریکنگ کے لیے ڈیجیٹل سسٹم فراہم کیا گیا ہے(فوٹو، ایکس اکاونٹ)

واضح رہے ایکسپریس کارگو سروس کے حوالے سے جو امارات ایئر کی جانب سے جو اشتہار دیا گیا ہے اس میں ایئرلائن کے ایئربس اے 380 کو ایک رہائشی علاقے میں دکھایا گیا ہے جبکہ ایئرہوسٹس پارسل تھامے ایک گھر کے سامنے کھڑی ہے۔
دریں اثنا خلیج ٹائمز کے مطابق ایمریٹس ایئر کی جانب سے کارگو سروس گزشتہ برس سے محدود پیمانے پر جاری کیا گیا تھا جو سعودی عرب، بحرین، کویت، عمان، جنوبی افریقا اور برطانیہ کے لیے تھی۔
ابتدائی سروس میں پارسل ڈیلیوری کے لیے اوسطا وقت 48 گھنٹے ریکارڈ کیا گیا جس میں مزید بہتری لانے کے بعد سروس کو وسعت دی گئی۔
ایئرلائن کے نائب صدر کا کہنا تھا کہ کارگو سروس کے لیے ٹریکنگ سسٹم مکمل ڈیجیٹل ہے جس کے ذریعے کہیں سے بھی صارف اپنے پارسل کی ٹریکنگ باسانی کرسکتا ہے۔ فوری سروس کے تحت پارسل کی ڈلیوری دوسرے دن ہوتی ہے۔

شیئر: