پاکستانی کرکٹرز نے کیوی چیلنج کیلئے تیاری کر لی

نیلسن : پاکستان کرکٹ ٹیم کی نئے سال کے پہلے چیلنج سے نمٹنے کےلئے سخت ٹریننگ شیڈول کے ذریعے تیاری جاری ہے جبکہ نیوزی لینڈ کے خلاف 5 ون ڈے میچوں کی سیریز میں فتح کے حصول کے لئے حکمت عملی بھی بنا لی ہے۔گرین شرٹس نے نئے سال کے پہلے چیلنج کاسامنے کرنے کےلئے نیلسن کی پہاڑیوں کی سیروتفریح کے بعد گزشتہ روز قومی ٹیم نے سیکسٹن اوول گراونڈ میں پہنچ کر 3 گھنٹے سے زائد وقت بھرپور ٹریننگ کی۔ٹریننگ میں سرفراز احمد، اظہر علی، فخر زمان، امام الحق، بابر اعظم، شعیب ملک، محمد حفیظ، حارث سہیل، فہیم اشرف، شاداب خان، محمد نواز، محمد عامر، حسن علی، عامر یامین اور رومان رئیس شامل تھے۔ قومی ٹیم کا پہلا سیشن فزیکل ٹریننگ کے نام رہا، ابتدا میں کھلاڑیوں کو گراونڈز کے چکر لگا کر وارم اپ کیا گیا۔بعد ازاں مخصوص ایکسرسائزز کرائی گئی، اس موقع پر فیلڈنگ کوچ اسٹیورکسن نے کھلاڑیوں کو کیچ پکڑنے اور دور سے وکٹ کو ہٹ کرنے کی بھر پور پریکٹس کروائی، بعد ازاں غیرملکی فیلڈنگ کوچ کی توجہ کا مرکز قومی کپتان رہے، اسٹیورکسن نے سرفراز احمد کو ہر سیشن میں10،10 کیچ پکڑنے کا خصوصی ٹاسک دیا، سرفراز احمد ہر بار تمام کیچ تھامنے میں کامیاب رہے۔فیلڈنگ سیشن کے بعدکوچز کی توجہ کا محور بولنگ اور بیٹنگ کے شعبے میںرہا۔ بولرز محمد عامر سمیت پیسرز کو نیوزی لینڈ کی گھاس والی وکٹوں پر بولنگ کی بھر پور پریکٹس کروائی گئی۔ اس موقع پر بولرز کو ہدایت کی گئی کہ وہ تیز گیندیں پھینکنے کے ساتھ لائن اور لینتھ کا پورا پورا خیال رکھیں۔ نیوزی لینڈ میں موجود پاکستان کرکٹ ٹیم کے غیرملکی اسٹاف نے بیٹسمینوں بالخصوص اوپنرز کو پریکٹس کے دوران خصوصی ہدایت کی کہ وہ باہر جاتی گیندوں کے ساتھ چھیڑخانی کی بجائے میرٹ پر کھیلیں۔ دورے کا آغاز 3 جنوری کو نیوزی لینڈ الیون کے خلاف ٹور میچ سے ہوگا۔ نیوزی لینڈ اور پاکستان کے مابین 5 ون ڈے میچوں پر مشتمل سیریز کا پہلا میچ 6 جنوری کو ویلنگٹن میں کھیلا جائے گا۔ دوسرا میچ 9 جنوری نیلسن، تیسرا 13 جنوری کو ڈونیڈن، چوتھا 16جنوری کو ہیملٹن اور پانچواں 19جنوری کو ویلنگٹن میں کھیلا جائے گا جبکہ ٹی ٹوئنٹی سیریز کا پہلا میچ 22 جنوری کو ویلنگٹن، دوسرا 25 جنوری کو آکلینڈ اور تیسرا 28 جنوری کو ماونٹ مانگینوئی میں کھیلا جائے گا۔