لالی وڈ کو سچے فلمسازوں کی ضرورت ہے، لیلیٰ
لالی وڈ کی معروف اداکارہ لیلیٰ نے کہا ہے کہ اس وقت پاکستانی فلم انڈسٹری کو سچے اور پروفیشنل فلمسازوں کی ضرورت ہے۔ اپنے ایک انٹرویو میں اداکارہ لیلیٰ نے کہا کہ لالی وڈ کے شاندار ماضی میں بڑے بڑے اداکاروں نے اپنی صلاحیتوں کے بل پر مختلف کرداروں میں حقیقت کے رنگ بھرے۔ اس کے علاوہ فلم میکرز اور ڈائریکٹرز کا اپنے کام سے عشق ان کی فلمیں دیکھ کر نظرآتا تھا لیکن پھرایسا بھی ہوا کہ فارمولا فلمیں بننے لگیں اورآگے کی جانب بڑھنے کی بجائے فلم کا پہیابحران کی جانب بڑھ گیا۔
ایک طرف سینما گھرتباہ ہوئے تو دوسری جانب نگارخانے ویرانیوں میں کھو گئے۔ یہی نہیں منافع خور فلم میکرز اور سرمایہ کاروں نے بھی لالی وڈ سے آنکھیں پھیریں کہ پھر ہر طرف اندھیرا ہی اندھیرا دکھائی دیا۔ ہمارے پروڈیوسرز اور ڈائریکٹرز کوچاہئے کہ وہ عوام کوتفریح فراہم کرنے کے ساتھ ایسی فلمیں بنائیں جو سبق آموز ہوں۔ شدید بحران میں جن لوگوں نے لالی وڈ کو تنہا چھوڑا وہ اس کے ہمدرد نہیں بلکہ موقع پرست تھے۔ اس وقت اگر سچے اور پیشہ ور دو، چار لوگ بھی انڈسٹری کا حصہ بن جائیں تو اس کا بحران ختم ہوسکتا ہے۔
