اسلام آباد... ترجمان دفترخارجہ ڈاکٹرمحمد فیصل نے کہا ہے کہ لیبیا میں کشتی حادثے میں جاں بحق پاکستانی افراد کی لاشیں وطن واپس لانے کے لئے ٹھوس اقدامات کئے جارہے ہیں۔میڈیا سے گفتگو کرتے ہوئے ترجمان نے کہا کہ لیبیا میں کشتی حادثے کا واقعہ 31 جنوری کوپیش آیا ۔اسی دن پاکستانی مشن کے افسران جائے حادثہ پہنچ گئے جنہیں بتایا گیا کہ حادثے میں 13 پاکستانیوں کی لاشیں مل چکی ہیں۔ حادثے میں بچ جانے والے ایک پاکستانی نے بتایا کہ انسانی اسمگلرغیر قانونی طور پر کشتی کے مسافروں کو یورپ لے کرجا رہے تھے ۔بدقسمت کشتی میں سوار 80 سے 90 افراد میں سے 32 پاکستانی تھے۔ جاں بحق پاکستانی شہریوں کی میتوں کو واپس لانے کےلئے اقدامات کررہے ہیں۔ اس عمل کی نگرانی وزیرِ خارجہ خواجہ آصف اور سیکرٹری خارجہ تہمینہ جنجوعہ خود کرر ہیں ہیں۔ پاکستانی سفارت خانے کو فنڈز بھی مہیا کر دیئے گئے۔ امید ہے ایک ہفتے میں یہ عمل مکمل ہوجائے گا۔ انہوں نے کہا کہ جاں بحق شہریوں سے متعلق معلومات وزارت خارجہ کی ویب سائٹ پردستیاب ہیں۔
