ووٹ دو،کراچی کو لاہور بنا دینگے،شہباز شریف
پتوکی... مسلم لیگ کے قائم مقام صدر اور وزیر اعلیٰ پنجاب شہباز شریف نے کہا ہے کہ نواز شریف کی صدارت کو تو ختم کردیا گیا لیکن ان کی محبت لوگوں کے دلوں سے نہیں جاسکتی۔عوام نے ساتھ دیا تو آئندہ انتخابات میں پورے پاکستان میں مسلم لیگ (ن) کی حکومت ہوگی۔پتوکی میں جلسے سے خطاب کرتے ہوئے انہوں نے کہا کہ نواز شریف لوگوں کے دلوں میں بستے ہیں اور وہ پاکستان کی آن ہیں۔ نواز شریف مسلم لیگ (ن) کے ہمیشہ قائد رہیں گے۔انہوں نے کہا کہ عمران خان پر عوام نے اعتماد کرکے ووٹ دیا لیکن انہوں نے صوبے کے معاشی حالات کا بیڑا غرق کردیا۔ 2014 میں دھرنا دے کر قوم کا وقت ضائع کیا۔انہوں نے کہا کہ (ن) لیگ نے اپنے اقتدار میں اربوں ڈالر کی سرمایہ کاری سے لوڈ شیڈنگ ختم کردی۔ انہوں نے کہا کہ کراچی میں ٹوٹی ہوئی بسیں چلتی ہیں۔ ہر طرف کچرے کا ڈھیر ہے۔ اگر کراچی والوں نے (ن) لیگ کو ووٹ دیا تو کراچی کو لاہور بنادیں گے۔عوام نے (ن) لیگ کو منتخب کیا تو پاکستان کو تبدیل کردیں گے۔ عمران خان پر تنقید کرتے ہوئے انہوں نے کہاکہ چیئرمین تحریک انصاف نے ساڑھے 4 سال ضائع کر دئیے ۔کوئی کام نہیں کیا بلکہ میٹرو بنانے کے لئے پورا پشاور کھود دیا ۔اگر ہماری حکومت آئی تو ایک سال میں پشاور میں میٹرو بنائیں گے۔انہوں نے کہا کہ عمران خان اتنا جھوٹ بولتے ہیں کہ انہیں جھوٹوں کی پارٹی بنا لینی چاہیے۔ اسی جھوٹ پر عمران خان کے خلاف 10 ارب ہرجانے کا دعویٰ کیا۔ سپریم کورٹ سے درخواست کرتا ہوں کہ وہ اس جھوٹ پر نوٹس لیں۔ عمران خان نے اپنی جھوٹی باتیں ثابت کردی تو میں سیاست چھوڑدوں گا لیکن اگر وہ ثابت نہیں کرسکے تو انہیں گھر چلے جانا چاہیے۔
