اینٹی شپ کروز میزائل فائر کا شاندار مظاہرہ

کراچی ... پاک بحریہ اور پاک فضائیہ نے شمالی بحیرئہ عرب میں لانگ رینج اینٹی شپ کروز میزائل فائر کرنے کا شاندار مظاہرہ کیا ہے۔ نیول چیف اسٹاف ایڈمرل ظفر محمود عباسی نے پاک فضائیہ کے سربراہ ایئر چیف مارشل سہیل امان کے ہمراہ بحری جہاز پی این ایس نصر سے لائیو ویپن فائرنگ کا شاندار مظاہرہ دیکھا۔ میزائل فائرنگ کا مظاہر ہ پاک فضائیہ کے لڑاکا طیارے جے ایف 17تھنڈر اور پاکستان نیوی کے جہاز پی این ایس سیف سے کیا گیا جو کثیر المقاصدفریگیٹ ہے۔ پاک بحریہ اور پاک فضائیہ کی جانب سے میزائل فائرنگ کا یہ مشترکہ مظاہرہ بحری مشق رباط۔18کے اختتام پر کیا گیا۔ اس بحری مشق کا بنیادی مقصد ابھرتے ہوئے کثیر الجہتی خطرات کے تناظر میں جنگی تصورات اور طریقہ کار کی جانچ کرنا تھا۔ میزائلوں نے اپنے اپنے اہداف کو پوری کامیابی سے نشانہ بنایا جو پاک بحریہ اور پاک فضائیہ کے مابین سمندر اور فضاکے درمیان مشترکہ آپریشنز کی صلاحیت کا منہ بولتا ثبوت ہے۔ سربراہ پاک بحریہ ایڈمرل ظفر محمود عباسی نے اس موقع پر کہا کہ پاک بحریہ مضبوط اور مستحکم قوت بن چکی ہے جو ملک کے بحری مفادات کے تحفظ اور بحر ہند میں بین الاقوامی فرائض کی کما حقہ ادائیگی کی مکمل صلاحیت رکھتی ہے۔ 

مزید پڑھیں:پاک فضائیہ میں آگسٹا ہیلی کاپٹر کی شمولیت