ظہران.... سعودی آرامکو اور فرانسیسی پیٹرولیم کمپنی ٹوٹل کے مابین پیٹرولیم مصنوعات تیارکرنے کے معاہدے پر دستخط کئے گئے ۔ دوطرفہ معاہدہ ولی عہد مملکت و وزیر داخلہ شہزادہ محمد بن سلمان کے دورہ فرانس کے موقع پر کیا گیا ۔ معاہدے کے مطابق فرانسیسی کمپنی ٹوٹل اورسعودی آرامکو کے اشتراک سے الجبیل انڈسٹریل سٹی میں عظیم الشان پیٹروکیمیکل انڈسٹری قائم کی جائے گی ۔ قائم کی جانے والی ریفائنری میں سعودی آرامکو کا 62.5 فیصد جبکہ ٹوٹل کمپنی کا 37.5 فیصد شیئر ہو گا ۔ اس وقت الجبیل میں جو ریفائنری کام کررہی ہے اس کی یومیہ پیداوار 440 ہزار بیرل ہے جبکہ 2014 سے قبل اس کی پیدواری صلاحیت 4لاکھ بیرل یومیہ تھی ۔ فرانسیسی کمپنی کے اشتراک سے قائم کی جانے والی نئی ریفائنری جدید ٹیکنالوجی کی حامل ہوگی جہاں پیٹروکیمیکل مصنوعات بھی تیار کی جائیں گی جن میں ایتھلین و غیر ہ بھی شامل ہے ۔ ریفائنری کی تعمیر پر کام کا آغاز 2018کی دوسری سہہ ماہی سے ہوجائے گا جس کی مجموعی لاگت 9 ارب ڈالر ہو گی ۔پیٹروکیمیکل ریفائنری کے قیام سے 8ہزار افراد کو روزگار ملنے کی توقع ہے ۔ اس ضمن میں ٹوٹل کمپنی کے چیف ایگزیکیٹو آفیسر پیٹرک بویونیہ نے کہا کہ مشترکہ منصوبہ کے قیام سے مستقبل میں بہترین نتائج برآمد ہونگے ۔ منصوبے کو جدید خطوط پر مرتب کیاجائے گا جو مملکت کے مستقبل کے وژن 2030 کو مدنظررکھتے ہوئے تیار کیاجارہا ہے ۔
