اللہ کے نیک بندوں پر آزمائشیں آتی رہتی ہیں،نواز شریف
لاہور ...سابق وزیراعظم نواز شریف نے کارکنوں کو ہدایت کرتے ہوئے کہا ہے کہ میری نااہلی پر احتجاج کرکے عوام کو پریشان نہیں کرنا کیونکہ اللہ کے نیک اور برگزیدہ بندوں پر آزمائشیں آتی رہتی ہیں۔ ان خیالات کا اظہار جاتی امرا میں نماز جمعہ کی ادائیگی کے بعد کارکنوں سے غیر رسمی گفتگو کرتے ہوئے کیا۔ انہوں نے ہدایت کی کہ سپریم کورٹ کے نااہلی کے فیصلے پر احتجاج کرکے عوام کو پریشان مت کرنا آپ سب صبر سے کام لیں اچھا اور بُرا وقت آتا رہتا ہے یہ اللہ کے فیصلے ہیں۔ انہوں نے کارکنوں کو پیغمبروں کے حوالے دیئے کہ حضرت یوسف علیہ السلام کو بھائیوں نے کنویں میں ڈالا لیکن انہوں نے صبر کیا اور حضرت لوط علیہ السلام پر بھی مصیبتیں آئیں۔ مصیبت میں صبر اور شکر سے کام لینا چاہیے انہوں نے مزید کہا کہ بُرے وقت میں ساتھ دینے والا اچھا ساتھی ہوتا ہے۔ اسلئے لاکھوں اور کروڑوں دوست بنانے سے چند وفادار دوست ہی بہتر ہیں۔دریں اثناءنواز شریف نے کہا کہ عدالتوں سے اسی قسم کے فیصلوں کی توقع تھی۔ اس سے ظاہر ہوتا ہے کہ میری ذات ہی ہدف تھی۔ یہ سب انتقامی کارروائیاں ہیں۔
