تیسری عالمی پیغام اسلام کانفرنس آج لاہور میں ہوگی، اشرفی

لاہور..... تیسری عالمی پیغام اسلام کانفرنس آج لاہور میں ہو گی ۔ کانفرنس میں شرکت کیلئے 12اسلامی ممالک کے مندوبین لاہور پہنچ گئے۔کانفرنس میں مختلف اسلامی ممالک کے سفراءاور ملک بھر سے 5000 سے زائد علماءو مشائخ شریک ہوں گے۔ یہ بات پاکستان علماءکونسل کے مرکزی چیئرمین اور وفاق المساجد پاکستان کے صدر حافظ محمد طاہر محمود اشرفی نے ایوان اقبال لاہور کے باہر ذرائع ابلاغ کے نمائندوں سے گفتگو کرتے ہوئے کہی۔ اس موقع پر مولانا عبد الحمید وٹو ، قاضی مطیع اللہ سعیدی ، مولانا محمد ایوب صفدر ، مولانا احمد ندیم ، مولانا اسید الرحمن سعید، مولانا اسد اللہ فاروق، مولانا عبد القیوم فاروقی، مولانا محمد اشفاق پتافی ، مولانا محمد اسلم قادری بھی موجود تھے۔ حافظ طاہراشرفی نے کہا کہ پاکستان علماءکونسل کے تحت ہونے والی تیسری عالمی پیغام اسلام کانفرنس انتہا پسندی ، دہشت گردی ، فرقہ وارانہ تشدد اور اسلامی اور عرب ممالک میں بیرونی مداخلتوں کے حوالے سے متفقہ لائحہ عمل سامنے لائے گی۔ انہوں نے کہا کہ کانفرنس میں تحفظ ارض الحرمین الشریفین کیلئے اہم فیصلے کئے جائیں گے ۔ کانفرنس کی دوسری نشست کی صدارت سعودی عرب کے مذہبی امور کے سیکریٹری کریں گے ۔