کراچی نیشنل اسٹیڈیم کے ترقیاتی کام کی رفتار

کراچی:نیشنل اسٹیڈیم کراچی میں ترقیاتی کام دسمبر میں مکمل ہوجائے گا جبکہ آئندہ پی ایس ایل سے قبل تاریخی وینیو ایک نئے روپ میں نظر آئے گا۔کراچی میں نیشنل اسٹیڈیم میں تعمیراتی کام کا پہلا مرحلہ پی ایس ایل تھری فائنل اور ویسٹ انڈیز کیخلاف سیریز سے قبل مکمل کیا گیا۔دوسرے مرحلے کا کام روک کر ان ایونٹس کا انعقاد کرایا گیا۔تماشائیوں نے چھت کے بغیر اسٹینڈز کے باوجود ان مقابلوں سے بھرپور لطف اٹھایا۔ طویل تاریخ رکھنے والے وینیو میں اب دوبارہ بڑی تیزی سے تعمیراتی امور مکمل کرنے کی کوشش ہو رہی ہے۔ نیسپاک کے انجینئر اسلم بھٹو نے بتایا کہ پویلین بلڈنگ میں چیئرمین باکسز اورتیسرے فلور کی چھتیں گرا دی گئی ہیں جنھیں نئے سرے سے تعمیرکیا جائے گا۔جرمنی کی ایک کمپنی اگست کے وسط میں چھتوں کا میٹریل کراچی بھیج دے گی تو اس کی تنصیب شروع کردیں گے۔انھوں نے بتایا کہ چیئرمین باکس اے اور بی کو اکٹھا کردیا گیا ہے۔ ڈریسنگ روم پہلے ہی مکمل کرلیا گیا تھا، اسٹینڈز میں نئی کرسیاں بھی لگائی جائیں گی۔دوسرے مرحلے کاتمام کام دسمبر میں مکمل کرلیا جائے گا،آئندہ پی ایس ایل سے قبل ہی پورا نیشنل اسٹیڈیم نئے روپ میں نظر آئے گا۔نہ صرف عمارت اور اسٹینڈز بلکہ وینیو میں موجود تمام سہولیات عالمی معیار کے مطابق ہونگی۔