جنوبی افریقہ نے سری لنکا کو 5 وکٹوں سے ہرادیا

دمبولا :کاگیسوربادا اور تبریز شمسی کی عمدہ بولنگ کے باعث جنوبی افریقہ نے سری لنکا کو پہلے ون ڈے انٹرنیشنل میچ میں 5 وکٹوں سے شکست دے کر 5میچوں کی سیریز میں 0-1 کی برتری حاصل کر لی۔ جنوبی افریقہ نے 194 رنز کا ہدف 31 اوورز میں 5 وکٹوں کے نقصان پر حاصل کیا۔ جے پی ڈومینی نے ناٹ آوٹ 53 رنز بنا کر ٹیم کو فتح دلائی۔ ربادا اور شمسی نے 4، 4 وکٹیں لیکر جیت میں کلیدی کردار ادا کیا۔سری لنکا کے کو شل پریرا کی 81 رنز کی اننگز ٹیم کو فائدہ نہ دے سکی۔ تبریز شمسی مین آف دی میچ رہے ۔ دمبولا میں کھیلے گئے پہلے ایک روزہ میچ میں سری لنکن کپتان اینجلو میتھیوز نے ٹاس جیت کر پہلے بیٹنگ کا فیصلہ کیا جو مہنگا ثابت ہوا۔ میزبان ٹیم 34.3 اوورز میں 193 رنز بنا کر آوٹ ہو گئی۔ آئی لینڈرز کی اننگز کا آغاز انتہائی مایوس کن تھا اور 36 کے اسکور پر اس کے 5 کھلاڑی پویلین لوٹ گئے۔نیروشن ڈکویلا 2، کو شل مینڈس 3، اپل تھرنگا 10، کپتان میتھیوز 5 اور شیہان جے سوریا بغیر کوئی رن بنائے آوٹ ہوئے ۔ اس موقع پر کو شل پریرا نے تھیسارا پریرا کے ساتھ مل کر 92 قیمتی رنز جوڑ کر ٹیم کا اسکور 128 تک پہنچا دیا۔ یہاں پر شمسی نے تھیسارا کو اآوٹ کر کے اہم پارٹنرشپ توڑ ڈالی۔ انہوں نے 49 رنز بنائے۔ 166 کے ا سکور پر دھننجایا 11 رنز بنا کر چلتے بنے۔ 179 کے ا سکور پر میزبان ٹیم کو 8واں نقصان اٹھانا پڑا جب کوشل پریرا جو کہ اچھی بیٹنگ کر رہے تھے 81 کے انفرادی اسکور پر تبریز شمسی کی گیند کا نشانہ بنے۔ اس کے بعد کوئی بھی کھلاڑی زیادہ دیر تک وکٹ پر نہ ٹھہر سکا۔ سرنگا لکمل 5 اور کمارا 3 رنز بنا کر آوٹ ہوئے۔ سنداکان 5 رنز بنا کر ناٹ آوٹ رہے۔ ربادا اور شمسی نے 4، 4 اور لونگی نگیڈی نے ایک وکٹ لی۔ جواب میں جنوبی افریقی ٹیم نے مطلوبہ ہدف 31 اوورز میں 5 وکٹوں کے نقصان پر پورا کیا۔ پروٹیز کی اننگز میں 31 پر 2 وکٹیں گر گئیں۔ہاشم آملہ 19 اور ایڈن مارکرم صفر پر آوٹ ہوئے۔ اس موقع پر کوئنٹن ڈی کوک اور کپتان فاف ڈوپلیسس نے میدان سنبھالا۔ دونوں بلے بازوں نے ذمہ دارانہ بیٹنگ کرتے ہوئے تیسری وکٹ کی شراکت میں 86 رنز جوڑ کر ٹیم کا اسکور 117 تک پہنچا دیا۔ یہاں پر د ھننجایا نے ڈی کوک کو آوٹ کر کے ٹیم کو اہم کامیابی دلائی۔ کوک نے 47 رنز بنائے، ان کے آوٹ ہونے کے بعد ڈوپلیسس بھی ہمت ہار گئے اور وہ 47 رنز بنا کر سنداکان کی گیند کا نشانہ بنے۔ 172 کے ا سکور پر ڈیوڈ ملر 10 رنز بنانے کے بعد چلتے بنے۔ ڈومینی نے ڈٹ کر حریف بولرز کا مقابلہ کیا۔ انہوں نے 2 چھکوں اور 6 چوکوں کی مدد سے 53 رنز کی ناقابل شکست اننگز کھیل کر میزبان ٹیم کی جیت کی امیدوں پر پانی پھیر دیا۔ ملڈر 14 رنز کےساتھ ناٹ آوٹ رہے ۔ دھننجایا نے 3، لکمل اور سندا کان نے ایک، ایک وکٹ لی۔