سندھ: اپوزیشن لیڈر کے لیے پی ٹی آئی کا نام فائنل
کراچی: عام انتخابات کے بعد سندھ میں پیپلز پارٹی واضح برتری حاصل کرکے ایک بار پھر صوبے میں اپنی حکومت بنانے کی تیاریوں میں مصروف ہیں اسی دوران پاکستان تحریک انصاف نے اپوزیشن لیڈر کے لیے ناموں پر غور کرنا شروع کردیا ہے۔ اس حوالے سے ذرائع کا کہنا ہے کہ فردوس شمیم نقوی سندھ میں قائد حزب اختلاف کے مضبوط ترین امیدوار ہو سکتے ہیں۔
نجی ٹی وی کے مطابق سندھ اسمبلی میں تحریک انصاف 23 نشستوں کے ساتھ دوسری سب سے بڑی جماعت بن کر سامنے آئی ہے جب کہ ایم کیو ایم کو 16 اور جی ڈی اے کو 11 نشستیں حاصل ہیں۔ ذرائع کا کہنا ہے کہ چیئرمین پی ٹی آئی عمران خان سے گزشتہ روز سندہ کے رہنماؤں نے بنی گالہ میں ملاقات کی اور اس دوران صوبے میں اپوزیشن لیڈر کے لیے عمران اسماعیل، خرم شیر زمان اور فردوس شمیم نقوی کے ناموں پر غور کیا گیا۔
ذرائع کا کہنا ہے کہ عمران خان نے اپوزیشن لیڈر سندھ کے لیے تینوں ناموں میں سے فردوس شمیم نقوی کے نام کو فائنل کر دیا جب کہ اپوزیشن لیڈر کے لیے ایم کیو ایم، جی ڈی اے اور دیگر جماعتوں سے بھی رابطہ کیا جائے گا۔
