زخمی حاجی محمد سلمان میمن پاکستان روانہ
جمعرات 13 ستمبر 2018 3:00
مکہ مکرمہ(محمد عامل عثمانی) پاکستان والنٹیرحج گروپ کے محمد لقمان اللقمان نے اردونیوز کو بتایا کہ مدینہ منورہ سے مکہ مکرمہ آتے ہوئے سندھ پاکستان کے جو3حاجی ٹریفک حادثے میں جاں بحق ہو گئے تھے ان کی تدفین مقررہ قانونی کارروائی کے بعد مکہ مکرمہ میں کر دی گئی۔ محمد عمران بن محمد ندیم، محمد علی بن عبدالرزاق اور محمد رضوان میمن جاں بحق ہوئے تھے۔ زخمی حاجی محمد سلمان میمن کو سفری و طبی کارروائی مکمل کر کے پاکستان روانہ کر دیا گیا۔ دو بیواؤں کو بھی ان کے ہمراہ بھیج دیا گیا۔ اللقمان نے بتایا کہ والنٹیر حج گروپ کے زاہد شریف کی کوشش کی بدولت مذکورہ حادثے میں جاں بحق ہونے والے پاکستانی ڈرائیور محمد احتشام بن نذیر کی تفصیلات بھی معلوم ہو گئیں اور ان کی بھی تدفین کر دی گئی۔ ان کا تعلق ڈیرہ غازی خان سے تھا۔
