کراچی: سندھ حکومت نے صوبے میں ڈاکٹروں کی کمی پوری کرنے کے لیے اہم فیصلہ کیا ہے۔ ذرائع کے مطابق صوبائی حکومت نے تحریری امتحان کے بغیر صرف انٹرویوز ہی کی بنیاد پر ڈاکٹرز کی بھرتی کا فیصلہ کیا ہے، جس کے تحت ڈیڑھ ہزار سے زائد ڈاکٹرز بھرتی کیے جائیں گے۔ اس حوالے سے سرکاری ذرائع کا کہنا ہے کہ سندھ پبلک سروس کمیشن کے ذریعے امتحان لینا طویل مرحلہ ہے، لہٰذا وقت بچانے اور عوام کو فوری ریلیف دینے کے لیے یہ فیصلہ کیا گیا ہے۔صوبائی مشیر اطلاعات بیرسٹر مرتضیٰ وہاب نے ڈاکٹرز کی بھرتی سے متعلق بات کرتے ہوئے مزید کہا کہ یہ فیصلہ سرکاری اسپتالوں میں ڈاکٹروں کی کمی کے پیش نظر کیا گیا ہے اور سندھ کابینہ اس حوالے سے فیصلے کی منظوری دے چکی ہے۔ ابتدائی طور پر ماہر اور ایم بی بی ایس ڈاکٹروں کو کانٹریکٹ کی بنیاد پر اور تعلیمی اسناد کی جانچ پڑتال کے بعد بھرتی کیا جائے گا۔مشیر اطلاعات کا کہنا تھا کہ بھرتی کیے گئے ڈاکٹروں کو بعد میں سندھ پبلک سروس کمیشن کا امتحان پاس کرنا ہوگا۔ ڈاکٹرز کی بھرتی فوری شروع کرنے کے لیے وزیراعلیٰ سندھ نے محکمہ صحت کو ہدایات جاری کردی ہیں۔
