واشنگٹن۔۔۔میلانیا ٹرمپ نے اپنے شوہر سے تعلقات اور کشیدگی پر خاموشی توڑتے ہوئے حیران کن انکشافات کیے ہیں۔ امریکی ٹی وی چینل کو ایک انٹرویو میں میلانیا ٹرمپ نے نہ صرف اپنے شوہر سے تعلقات سے متعلق وضاحت کی بلکہ انہوں نے اور کئی مسائل پر بھی بات کی۔ ڈونلڈ ٹرمپ کی جانب سے دوسری مدت کے لیے صدارتی انتخابات لڑنے کے حوالے سے میلانیا ٹرمپ نے کوئی واضح جواب نہیں بلکہ اہم ترین سوال کو لفظوں میں گول کر گئیں۔ میلانیا ٹرمپ نے یہ واضح نہیں کیا کہ ان کے شوہر دوبارہ انتخابات میں حصہ لیں گے یا نہیں تاہم انہوں نے کہا کہ امریکہ جو بھی فیصلہ کرتا ہے، وہ اچھا ہی ہوتا ہے۔انٹرویو کے دوران میلانیا ٹرمپ صحافیوں، اداکاروں، کامیڈینز، تنقید نگاروں اور لکھاریوں سے بھی ناراض نظر آئیں اور کہا کہ انہیں ایسے افراد سے چڑ ہے جو ان کا اور ان کے خاندان کا نام استعمال کرکے فوائد حاصل کر رہے ہیں۔میلانیا ٹرمپ نے کہاکہ تنقید نگاروں اور لکھاریوں کی جانب سے لکھنے پر کوئی اعتراض نہیں بلکہ انہیں اس بات پر اعتراض ہے کہ لکھنے والے غلط تاریخ لکھ رہے ہیں۔ انہوں نے اپنے شوہر سے تعلقات پر بھی کھل کر بات کی اور دعویٰ کیا کہ ان کی اور ٹرمپ کی کیمسٹری بہت ملتی ہے۔ شوہر کے تعلقات کے حوالے سے شائع ہونے والی تمام خبریں بے بنیاد ہیں۔
