مولانا سمیع الحق قتل کیس ، قریبی شخص گرفتار

راولپنڈی: جے یو آئی (س) کے سربراہ مولانا سمیع الحق کے قتل کیس کے سلسلے میں اہم پیش رفت سامنے آئی ہے۔ ذرائع کے مطابق مولانا سمیع الحق کے پرسنل سیکرٹری احمد شاہ کو پولیس نے حراست میں لے لیا ہے۔ گزشتہ کئی ہفتوں سے پراسرار طور پر غائب مولانا کے پرسنل سیکرٹری احمد شاہ پولیس کو قتل کیس میں تحقیقات کیلئے مطلوب تھے۔ ذرائع کے مطابق حساس ادارے کے اہلکاروں نے تقریباً 6 روز قبل احمد شاہ کو حراست میں لیا اور راولپنڈی پولیس کے حوالے کردیا۔ واضح رہے کہ مولانا سمیع الحق کو 2 نومبر کو راولپنڈی میں ان کی رہائش گاہ پر چھریوں کے وار کرکے قتل کردیا گیا تھا۔ جس کے بعد وزیراعظم عمران خان نے قتل کی فوری تحقیقات کا حکم دیا تھا۔ تاہم قانون نافذ کرنے والے ادارے تحقیقات میں اب تک کوئی قابل ذکر پیشرفت نہیں کرسکے ہیں۔