کراچی: ایک اور اسکول وین میں آگ
کراچی: شہر قائد میں اسکول وینز میں آگ لگنے کے واقعات بڑھنے لگے۔ ذرائع کے مطابق فیڈرل بی ایریا میں ایک اور اسکول وین میں آگ لگنے سے ڈرائیور جھلس کر معمولی زخمی ہوگیا۔ ذرائع ابلاغ کے مطابق پولیس کا کہنا ہے کہ واقعہ ایف بی ایریا کی طاہر ولا چورنگی پر پیش آیا جہاںڈرائیور حساب کتاب کیلئے اسکول آیا تھا، تاہم چھٹی کا دن ہونے کی وجہ سے وین میں بچے نہیں تھے۔پولیس کے مطابق اسکول وین میں سلنڈر موجود تھا جبکہ ممکنہ طور پر وین میں آگ شارٹ سرکٹ کے باعث لگی جسے بجھانے کے دوران ڈرائیور کی انگلیاں زخمی ہوگئیں، تاہم وین مکمل طور پر جل گئی۔ قبل ازیں گزشتہ روز بھی کورنگی میں زمان ٹاﺅن کے قریب ایک اسکول وین میں آگ لگ گئی تھی۔ حادثے میں تمام بچے محفوظ رہے ، تاہم ڈرائیور معمولی زخمی ہوا تھا۔ اس سے قبل 5 جنوری کو بھی کراچی کے علاقے اورنگی ٹاﺅن میں قطر اسپتال کے قریب ایک اسکول وین میں آگ لگنے کے نتیجے میں 8 بچے جھلس کر زخمی ہوگئے تھے ۔ جس کے بعد صوبائی حکومت نے تمام اسکول وینز کی فٹنس چیک کرنے کی ہدایت کی تھی۔اور شہر بھر میں گیس سلنڈر لگی اسکول وین چلانے پر پابندی عائد کردی گئی تھی، جس کے خلاف آل کراچی اسکول اینڈ کالجز وین ایسوسی ایشن کی جانب سے ہڑتال بھی کی گئی۔
