ایل این جی کیس، نواز شریف بھی ملزم نامزد ؟

  اسلام آباد...نیب نے ایل این جی کیس میں سابق وزیراعظم شاہد خاقان عباسی کے بعد نواز شریف کو بھی ملزم نامزد کردیا۔ملزمان پر اختیارات کے ناجائز استعمال اور کرپشن سے قومی خزانے کو نقصان پہنچانے کا الزام ہے۔ دستاویزات کے مطابق ایل این جی ٹرمینل کا مبینہ طور پر غیر قانونی ٹھیکہ دینے پر انکوائری میں نواز شریف کو باقاعدہ ملزم نامزد کر دیا گیا ۔ٹھیکے میں بطور وزیر اعظم ان کے کردار کا تعین کیا جا رہا ہے۔ قواعد کی خلاف ورزی کرتے ہوئے ایل این جی کا ٹھیکہ دینے سے قومی خزانے کو 220 ارب روپے کا نقصان ہوا۔ وزارت پٹرولیم، سوئی سدرن گیس کمپنی سمیت دیگر افسران کے خلاف بھی اختیارات کے ناجائز استعمال اور کرپشن سے قومی خزانے کو اربوں روپے کا نقصان پہنچانے کے الزام میں تحقیقات کی جا رہی ہیں۔