انتہائی نگہداشت شعبے میں 2199 بستروں کا اضافہ

وزارت صحت نے سعودی عرب کے مختلف ہستپالوں کے آئی سی یو میں گزشتہ تین ماہ کے دوران دو ہزار ایک سو 99 بستروں کا اضافہ کیا ہے۔

سبق ویب سائٹ کے مطابق وزارت نے کہا ہے کہ ’کورونا وائرس کے انسداد اور اس کا شکار ہونے والے افراد کو بہترین معیار کی طبی خدمات کی فراہمی کے لیے آئی سی یو کے شعبے کو بڑھا دیا گیا ہے۔‘

’صحت کے شعبے میں اتنے مختصر وقت میں بستروں کا اضافہ کارنامہ ہے جسے وزارت صحت نے انجام دیا ہے۔‘

وزارت صحت کے سکریٹری ڈاکٹر طریف الاعمی نے کہا ہے کہ ’نئے بستر آئی سی یو کے شعبے میں 25 فیصد اضافہ ہیں۔‘

انہوں نے کہا ہے کہ ’سعودی عرب نے کورونا کا مقابلہ کرنے کے لیے پیشگی اقدامات کیے ہیں ان کے باعث ہلاک شدگان کی تعداد میں کمی آ رہی ہے۔‘

انہوں نے کہا ہے کہ ’کورونا وائرس کے مریضوں کی تعداد میں اضافے کا کوئی خواہشمند نہیں لیکن وزارت نے مکمل تیاریاں کر رکھی ہیں۔‘