پاکستان میں نئے کورونا کیسز میں کمی

پاکستان میں کورونا کے ایکٹیو کیسز کم ہو کر 53 ہزار 652 رہ گئے ہیں۔

اتوار کی صبح جاری کیے گئے سرکاری اعداد وشمار کے مطابق پاکستان میں کورونا سے صحت یاب ہونے والے افراد کی تعداد دو لاکھ چار ہزار 276 ہو گئی ہے۔

نیشنل کمانڈ اینڈ آپریشن سنٹر کے مطابق پاکستان میں کورونا کے مریضوں کے لیے ہسپتالوں میں ایک ہزار 823 وینٹیلیٹرز مختص کیے گئے ہیں جن میں سے 298 وینٹیلیٹرز مریضوں کے استعمال میں ہیں۔

سرکاری اعداد وشمار کے مطابق گزشتہ 24 گھنٹوں کے دوران ملک بھر میں ایک ہزار 579 افراد کے کورونا ٹیسٹ مثبت آئے ہیں جبکہ اس دوران 46 مریضوں کی موت واقع ہوئی۔

گزشتہ روز پاکستان میں 22 ہزار 559 کورونا ٹیسٹ کیے گئے۔

ملک میں کورونا سے مرنے والے افراد کی مجموعی تعداد پانچ ہزار 568 ہو گئی ہے جن میں سے دو ہزار 79 مریض پنجاب اور ایک ہزار 974 مریض صوبہ سندھ میں ہلاک ہوئے۔

خیبر پختونخوا میں عالمی وبا کا شکار ہو کر مرنے والوں کی تعداد ایک ہزار 139 اور اسلام آباد میں 157 ہے جبکہ بلوچستان میں ہلاکتوں کی تعداد 131 ہے۔ گلگت بلتستان میں کورونا سے 41 جبکہ پاکستان کے زیرانتظام کشمیر میں 47 اموات ہوئی ہیں۔