ساؤتھمپٹن: پاکستان کے نو وکٹوں پر 223 رنز

پاکستان اور انگلینڈ کی کرکٹ ٹیموں کے درمیان ساؤتھمپٹن ٹیسٹ کے دوسرے روز کا کھیل خراب روشنی کے باعث جلد ختم کر دیا گیا۔ پاکستان نے 9 وکٹوں کے نقصان پر 223 رنز بنا لیے ہیں۔

وکٹ کیپر بیٹسمین محمد رضوان 60 رنز کے ساتھ کریز پر موجود ہیں جبکہ نسیم شاہ نے ایک رن بنایا ہے۔

اس سے قبل بابر اعظم 47 رنز بنا کر سٹوارٹ براڈ کی گیند پر کیچ آؤٹ ہو گئے جبکہ شاہین شاہ آفریدی بغیر کوئی رن بنائے رن آؤٹ ہوگئے۔ محمد عباس دو رنز بنانے کے بعد براڈ کی بال پر ایل بی ڈبلیو ہو گئے۔

انگلینڈ کی جانب سے جیمز اینڈرسن اور سٹوارٹ براڈ نے تین تین کھلاڑیوں کو آؤٹ کیا جبکہ ایس ایم کرن اور ووکس نے ایک ایک وکٹ حاصل کی۔مزید پڑھیں

ٹیسٹ میچ کے پہلے روز پاکستان کی بیٹنگ لائن شروع سے ہی مشکل کا شکار رہی۔ دوسرے ٹیسٹ میں پاکستان کی ٹیم نے ٹاس جیت کر پہلے بیٹنگ کرنے کا فیصلہ کیا تھا اور تیسرے ہی اوور میں اوپنر شان مسعود ایک رنز بنانے کے بعد آؤٹ ہو گئے تھے۔

اس کے بعد آنے والے بلے باز کپتان اظہر علی بھی زیادہ دیر وکٹ پر نہ ٹھر سکے اور 20 رنز بنا کر جیمز اینڈرسن کی بال پر روری برنز کے ہاتھوں کیچ آؤٹ ہو گئے۔

اوپنر آنے والے عابد علی نے ٹیم کو سہارا دیتے ہوئے 60 رنز بنائے اور برنز کے ہاتھوں کیچ آؤٹ ہوئے۔ اس کے بعد اسد شفیق صرف پانچ رنز بنا کر براڈ کی گیند پر کیچ دے بیٹھے۔

دس سال بعد ٹیم میں جگہ بنانے والے فواد عالم بغیر کوئی رنز بنائے آؤٹ ہوئے۔

انگلینڈ کے ہاتھوں مانچسٹر کے اولڈ ٹریفورڈ میدان میں کھیلے گئے پہلے ٹیسٹ میچ میں تین وکٹوں کی شکست کے بعد پاکستان کرکٹ ٹیم نے ساؤتھمپٹن میں دوسرے ٹیسٹ کے لیے ٹیم میں شاداب خان کی جگہ فواد عالم کو شامل کیا ہے۔

انگلینڈ کی ٹیم میں دو تبدیلیاں کی گئی ہیں۔ بین سٹوکس اور آرچر کی جگہ زیک کراولے اور سیم کرن کو شامل کیا گیا ہے۔ 

انگلینڈ کی ٹیم نے کپتان جو روٹ کی قیادت میں مسلسل چھ ٹیسٹ میچوں میں فتح حاصل کی ہے جبکہ ان کی قیادت میں انگلش ٹیم اب تک کل 23 ٹیسٹ میچز جیت چکی ہے۔

مانچسٹر میں کھیلے گئے پہلے ٹیسٹ میچ میں پاکستان کے کم تجربہ رکھنے والے بولرز نے عمدہ کارکردگی دکھائی تھی تاہم آخری اننگز میں جیتا ہوا میچ پریشر برداشت نہ کرنے کی وجہ سے ہار دیا۔

پاکستان کی بیٹنگ لائن نے سوائے پہلی اننگز میں شان مسعود کی سنچری کے، نے مایوس کن کارکردگی دکھائی۔ کپتان اظہر علی، اسد شفیق، عابد علی اور محمد رضوان دونوں اننگز میں مجموعی طور پر صرف 126 رنز بنا سکے۔

پہلا ٹیسٹ میچ ہارنے کے بعد اظہر علی کی کپتانی پر بھی سوالات اٹھنا شروع ہوگئے ہیں۔