اپنے آنسو مت روکیں مت

آنسووں سے ہمارا  پرانا تعلق ہے۔ جب ہم دکھی، پریشان، کسی تکلیف میں مبتلا، بہت زیادہ خوش یا کامیاب ہوتے ہیں تو بے اختیار آنکھوں سے آنسو بہنے لگتے ہیں۔ کسی کو روتا یا دکھی دیکھ کر بھی ہماری آنکھیں چھلک پڑتی ہیں۔ 

جذبات میں آکر آنسو بہانا انسانی جسم کی ان ضروریات میں سے ایک ہے جو ہزاروں برس سے چلی آرہی ہیں۔

 سعودی عرب کے میگزین الرجل میں شائع رپورٹ کے مطابق اب تک سائنسدانوں نے یہ  دریافت کرلیا ہے کہ آنسوؤں کے ساتھ انسانی جسم سے زہریلے مادے خارج ہوتے ہیں اور رونے کی بدولت انسان بے چینی اور تناؤ کے ماحول سے باہر نکل آتاہے۔

 سائنسدانوں کا کہنا ہے کہ رونے سے آنکھیں بیکٹریا کے خطرات سے محفوظ ہوجاتی ہیں۔ رونے کی بدولت آنکھوں کو بیکٹریا لگنے کے خطرات محدود ہوجاتے ہیں۔ آنسو بہانے سے آنکھیں صاف ہوجاتی ہیں اور آنکھوں کی نمی برقرار رہتی ہے۔اس کے برعکس جو لوگ آنسو روک لیتے ہیں اس سے ان کی صحت پر برا اثر پڑ سکتا ہے۔

 اگر آپ کو رونا آرہا ہو تو اسے روکنے کی کوشش نہ کریں۔ آنسوؤں کو روکنے سے دل کے عضلات اس کی دھڑکن اور اعصابی نظام پر برا اثر پڑتا ہے۔ جسم میں شوگر کا تناسب بڑھ جاتا ہے۔ بلڈ پریشر تیز ہوجاتا ہے اور سانس لینے میں مشکل پیدا ہوجاتی ہے۔

آنسو کے غدود ہماری آنکھوں میں مسلسل نمی پیدا کرتے ہیں جس سے ہماری آنکھیں محفوظ رہتی ہیں اور یہ نمی ہماری بینائی کو بھی محفوظ بناتی ہے۔

ہر بار جب ہم پلک جھپکتے ہیں تو یہ نمی ہماری آنکھوں میں پھیل جاتی ہے۔