گُوگل کا طالب علموں کے لیے کمپیوٹر پروگرام

دنیا کی بڑی امریکی ملٹی نیشنل انفارمیشن ٹیکنالوجی کمپنی گُوگل نے پاکستانی طالب علموں کے لیے کمپیوٹر پروگرام متعارف کرا دیا ہے۔

سی ایس فرسٹ نامی پروگرام سے سکول کی سطح پر کمپیوٹر ٹیکنالوجی کی تعلیم دی جائے گی۔

وزارت آئی ٹی، ٹیلی کام فاؤنڈیشن، ورچوئل یونیورسٹی اور ٹیک ویلی کی شراکت سے بدھ کے روز پروگرام کا باقاعدہ آغاز ہوگیا ہے۔

وفاقی وزیر آئی ٹی سید امین الحق نے گوگل کے تعاون سے اپنی نوعیت کے اس منفرد پروگرام کا افتتاح کیا۔ 

ابتدائی طور پر ٹیلی کام فاؤنڈیشن کے تین سکولوں میں سی ایس پروگرام کا آغاز کیا گیا ہے۔

وفاقی وزیر آئی ٹی امین الحق کا کہنا تھا کہ ‘جلد ہی اس پروگرام کو تمام سکولوں تک توسیع دی جائے گی۔ پروگرام کا مقصد بچوں کو ابتدائی کلاسوں سے ہی کمپیوٹر پروگرامز سے آگاہی دینا ہے۔‘

انہوں نے کہا کہ ’ڈیجیٹل پاکستان ویژن کے تحت یہ پروگرام پاکستانی بچوں کے لیے ایک بہترین پلیٹ فارم ثابت ہوگا۔ ڈیجیٹل ورلڈ کے چیلنجز کا مقابلہ کرنے کے لیے اس طرح کے پروگرام وقت کی ضرورت ہیں۔‘

وفاقی وزیر کا کہنا تھا کہ ’ہماری خواہش ہے کہ اس طرز کے پروگراموں کو پسماندہ اور دور دراز علاقوں تک توسیع دی جائے۔‘

’سی ایس فرسٹ پروگرام کے تحت کھیل ہی کھیل میں بچوں کو ٹیکنالوجی کی تعلیم دی جاسکے گی۔بہتر مستقبل کے لیے ابتدا ہی سے ٹیکنالوجی اور ہنرمندی کی بنیاد ڈالنا ضروری ہے۔‘