منفرد اور جدید ڈیزائن کی عمارت کے لیے ایکسلینس ایوارڈ
زھا حدید آرکیٹکٹ کا منفرد کام ہمیشہ غیر معمولی ،غیر روایتی اورتخلیقی رہا ہے۔(فوٹوعرب نیوز)
سعودی عرب کے دارالحکومت ریاض میں اپنی انتہائی خوبصورتی کے لیے مشہور عمارت نے انوکھے ، منفرد اور جدید فن تعمیر کے ڈیزائن کے لیے ایک معتبراور بڑا ایکسلینس ایوارڈ حاصل کیا ہے۔
عرب نیوز کے مطابق اس عمارت کو دنیا میں مشہور زھا حدید آرکیٹکٹ نے ڈیزائن کیا ہے۔ کنگ عبد اللہ پٹرولیم اسٹڈیز اینڈ ریسرچ سنٹر کی اس عمارت کو امریکن کنکریٹ انسٹی ٹیوٹ کی جانب سے عمدہ فن تعمیر پر یہ خاص امریکن ایوارڈ دیا گیا ہے۔
کے اے پی ایس آر سی نے سعودی عرب میں ہنی ویل سمارٹ بلڈنگ ایوارڈ "زبردست عمارت" کا اعزاز حاصل کیا ہے۔
منفرد نوعیت کی چھ کونوں والی اس عمارت کو دیکھ کر شہد کے چھتے کی ساخت کی مشابہت کا احساس ہوتا ہے۔
اس عمارت کے کیمپس کے قریب چہل قدمی کرتے ہوئے عمارت کا بیرونی حصہ انتہائی خوبصورت منظر پیش کرتا ہے۔
زبردست اور منفرد ڈیزائن والی اس عمارت میں انرجی کمپیوٹرسینٹر ، انرجی نالج سنٹر، کانفرنس ہال، نمائش ہال، آڈیٹوریم ، ریسرچ لائبریری اور عبادت کے لیے مخصوص جگہ شامل ہے۔
اسعمارت کی خاص بات یہ ہے کہ اس میں استعمال کیا گیا 30 فیصد میٹریل ری سائیکل شدہ مواد سے بنا ہوا ہے۔
سورج کی حدت سے محفوظ رکھنے کے لیے عمارت کو شمال اور مغرب کی جانب سے راستہ دیا گیا ہے۔ اس کے باعث عمارت کا اندرونی ماحول خوشگواررہتاہے۔
سعودی آرکیٹکچر مختار الشعیبی نے عرب نیوز سے بات کرتے ہوئے بتایا ہے کہ یہ زھا حدید کی جانب سے یہ عمارت سٹیل کو انتہائی پیچیدہ طریقے سے تیار کر کے بنائی گئی ہے۔
انہوں نے مزید کہا کہ اس عمارت کو بنانے والے ٹھیکیدار نے سٹیل کے کام میں ایک ایک جوڑ لگانے اور پھر اس پر چادریں فکس کرنے کے لیے انتہائی محنت کی ہے اور اب یہ عمارت سعودی عرب میں اس کے لیے ایک یادگار حیثیت کے طور پر موجود ہے۔
انہوں نے کہا کہ زھا حدید آرکیٹکٹ (زیڈ ایچ اے )کے منفرد منصوبے ہمیشہ غیر معمولی ، غیر روایتی اور تخلیقی رہے ہیں۔ میرا خیال ہے کہ پوری دنیا میں اس جیسی کوئی اور عمارت شاید نہیں ہے۔
سعودی ماہر مختار الشعیبی نے زھا حدید آرکیٹکٹ کے کام کو مملکت کے لیے پسندیدہ قرار دیا ہے ۔ انہوں نے کہا کہ یہ ایوارڈ ملنے پر ہم مبارکباد پیش کرتے ہیں۔
انہوں نے بتایا کہ سعودی آرکیٹکچر نے بھی فن تعمیر کے میدان میں متعدد ایوارڈ حاصل کر رکھے ہیں ان میں فن تعمیر کے لیے خاص آغا خان ایوارڈ بھی شامل ہے۔
ریاض ایک خوبصورت شہر ہے جس میں بہت سی دیگر منفرد عمارتیں بھی موجود ہیں ان میں کنگ عبداللہ فنانشل سٹی اور زیڈ ایچ اے کا ٹرین سٹیشن بھی شامل ہے۔
الشعیبی نے کہا کہ میں سعودیوں کو اس فن میں دلچسپی لیتے دیکھ کر فخر محسوس کرتا ہوں۔ انہوں نے مزید کہا کہ مملکت میں بھی بہت سارے بڑے پروجیکٹس آرہے ہیں اور میں ان کو دیکھنے کا بڑی شدت سے انتظار کر رہا ہوں۔
