مفتی انس سید کے ساتھ شادی زندگی کا بہترین فیصلہ تھا: ثنا خان

شوبز کو خیرباد کہنے والی بالی وڈ کی اداکارہ ثنا خان جن کی مفتی انس سید کے ساتھ شادی کو ایک ماہ ہوگیا ہے نے انسٹاگرام پر اپنی شادی کی ایک نئی ویڈیو شیئر کی ہے۔

ہندوستان ٹائمز کے مطابق ثنا خان نے انسٹاگرام پر لکھا کہ ’انس سید کے ساتھ شادی ان کی زندگی کا بہترین فیصلہ تھا۔‘

ثنا خان نے لکھا کہ ’گذشتہ ماہ اسی دن میں نے ’قبول ہے‘ کہا تھا، اس بات کو ایک ماہ ہوگیا ہے الحمد للہ، بس ایسے ہی ہنستے ہنستے پوری زندگی نکل جائے۔‘

انہوں نے مزید لکھا کہ ’میری ساسو ماں نے یہ دوپٹہ میرے لیے تیار کیا ہے۔‘

ثنا خان نے انس سید کے ساتھ رواں برس 20 نومبر کو شادی کی تھی، انہوں نے انسٹاگرام پر کہا کہ ’ہم نے اللہ کی رضا کے لیے ایک دوسرے سے محبت کی۔‘

ان کا یہ بھی کہنا تھا کہ ’ہم نے اللہ کی رضا کے لیے ہی ایک دوسرے سے شادی کی۔‘

’دعا ہے اللہ ہمیں اس دنیا میں اور جنت میں اکٹھا رکھے۔‘

رواں ماہ کے شروع میں ثنا اور انس ہنی مون کے لیے کشمیر گئے تھے۔ ثنا خان وہاں سے سیر و تفریح سے متعلق اپنی سرگرمیوں کی تصاویر مسلسل سوشل میڈیا پر شیئر کرتی رہیں۔

ثنا کے شوہر انس نے حال ہی میں ایک انٹرویو کے دوران کہا تھا کہ ثنا کا اداکاری چھوڑنے کے فیصلے سے میرا کوئی تعلق نہیں ہے۔

’میں نے انہیں ایک مخصوص انداز میں زندگی گزارنے کے لیے کبھی مجبور نہیں کیا۔‘

انہوں نے مزید کہا کہ ثنا نے قریباً چھ ماہ قبل انسٹاگرام پر یہ اعلان کیا تھا کہ وہ حجاب کریں گی۔ اس پر لوگوں نے کہا کہ شاید ایسا وہ وبا اور کام نہ ہونے کی وجہ سے کر رہی ہیں، لیکن درحقیقت وہ ہمیشہ اپنے کاموں سے خود کو الگ رکھنا چاہتی ہیں۔

انس سید کا کہنا تھا کہ میں انہیں یہ فیصلہ کرنے کے لیے کچھ وقت دینا چاہتا تھا لیکن وہ خود اس پر قائم تھیں۔

’درحقیقت میں بھی اُن کی جانب سے فلم انڈسٹری چھوڑنے کے اعلان پر حیران ہوا تھا۔‘

یاد رہے کہ ثنا خان نے انڈیا کے معروف ریئلٹی شو 'بگ باس' سیزن چھ میں شرکت کی تھی جہاں وہ شو کی رنر اپ رہی تھیں۔ اس کے علاوہ انہوں نے متعدد فلموں میں بھی کام۔ نامور اداکار سلمان خان کے ساتھ انہوں نے فلم 'جے ہو' میں ولن ڈینی ڈینگزو پا کی بیٹی کا کردار ادا کیا تھا۔

انہوں نے اپنے سوشل میڈیا اکاؤنٹ پر شوبز چھوڑنے کا اعلان کرتے ہوئے لکھا تھا کہ 'میں یہ اعلان کرتی ہوں کہ اپنی شوبز (فلم انڈسٹری) کی زندگی چھوڑ کر انسانیت کی خدمت اور اپنے پیدا کرنے والے کے حکم پر چلنے کا پکا ارادہ کرتی ہوں۔'

ثنا خان کی شادی کو سوشل میڈیا پر ٹرول کیا گیا۔ بہت سے لوگ انہیں ان کا ماضی یاد دلایا تو بہت سے لوگوں نے انہیں نئی زندگی شروع کرنے پر مبارک باد بھی دی۔