امریکہ اور یورپ کی سعودی عرب اور یمن پر حوثی حملوں کی شدید مذمت

امریکہ سمیت دیگر مغربی ممالک نے ایرانی حمایت یافتہ حوثیوں کے سعودی عرب پر حملوں اور یمن کے صوبہ مارب میں جارحانہ کارروائیوں کی سخت الفاظ میں مذمت کی ہے۔

عرب نیوز کے مطابق امریکہ کے علاوہ فرانس، جرمنی، اٹلی اور برطانیہ کی جانب سے جاری کیے گئے مشترکہ بیان میں کہا گیا ہے کہ حوثیوں کی کارراوائیاں امن کی کوششوں کو خطرے میں ڈال رہی ہیں اور انسانوں کی تکلیف میں مزید اضافے کا باعث بن رہی ہیں۔

مشترکہ بیان میں کہا گیا ہے کہ فرانس، جرمنی، اٹلی، برطانیہ اور امریکہ کی حکومتیں حوثیوں کی یمن کے شہر مارب پر جاری مسلسل جارحیت اور سعودی عرب کے خلاف بڑھتے ہوئے حملوں کی مذمت کرتی ہیں۔

امریکی سیکرٹری خارجہ انٹونی بلنکن نے بھی حوثیوں کے حملوں کی مذمت کرتے ہوئے ٹویٹ میں تمام فریقین سے سفارتی کوششوں میں شامل ہو کر یمن میں امن لانے میں اپنا کردار ادا کرنے کا کہا ہے۔

امریکی سیکرٹری خارجہ نے جمعے کو ٹویٹ میں کہا کہ امریکہ یورپی ممالک فرانس، جرمنی، اٹلی اور برطانیہ کے ساتھ حوثیوں کے سعودی عرب پر حملوں اور مارب پر جارحیت کی مذمت کرتا ہے۔

امریکی وزیر خارجہ نے مزید کہا کہ تمام فریقین اقوام متحدہ کے ذریعے سفارتی کوششوں میں شامل ہوں تاکہ یمن میں امن لایا جا سکے۔

امریکہ اور یورپی ممالک کی جانب سے جاری مشترکہ بیان میں ان تمام ممالک نے سعودی سرزمین کے دفاع اور سالمیت کے علاوہ یمن کے ساتھ سرحد پر استحکام اور امن کی بحالی کے لیے پختہ عزم کی یقین دہانی کروائی ہے۔

بیان کے مطابق مارب پر حوثیوں کے حملوں سے انسانی بحران مزید شدت اختیار کر رہا ہے۔

امریکہ اور مغربی ممالک نے یمن تنازعے کے جلد حل کے لیے پختہ تعاون کی یقین دہانی کروائی ہے، جس سے خطے میں استحکام کے علاوہ علاوہ یمن کے لوگوں کو فوری فائدہ پہنچائے گا۔

گزشتہ ماہ بھی حوثیوں نے تیل سے مالا مال یمنی صوبہ مارب پر قبضے کی غرض سے جارحانہ کارروائی کی تھی۔ چھ سال قبل شروع ہونے والی جنگ کے بعد سے صوبہ مارب اندرونی طور پر بے گھر ہونے والے افراد کے لیے پناہ گاہ ہے۔