عامر خان نے سات سال تک جوہی چاؤلہ سے بات کیوں نہیں کی؟

بالی وڈ کے مسٹر پرفیکشنسٹ عامر خان کا کہنا ہے کہ انہوں نے اپنی ساتھی اداکارہ جوہی چاؤلہ سے تقریباً چھ سے سات سال تک بات نہیں کی تھی۔

ہندوستان ٹائمز کے مطابق عامر خان کا کہنا تھا کہ انہوں نے کسی معمولی سے اختلاف پر جوہی چاؤلہ سے بات کرنا بند کر دی تھی۔

عامر خان اور جوہی چاؤلہ نے بالی وڈ میں فلمی کیریئر کا آغاز فلم ’قیامت سے قیامت تک‘ سے کیا تھا۔

عامر خان نے اپنی ایک دستاویزی فلم کی سکریننگ کے موقع پر بتایا کہ عشق فلم کی شوٹنگ کے دوران کسی معمولی سی بات پر ان کا جوہی چاولہ سے جھگڑا ہو گیا تھا تو انہوں نے سوچا کہ وہ آئندہ کبھی بھی اپنی ساتھی اداکارہ سے بات نہیں کریں گے۔

عامر خان کا کہنا تھا کہ فلم کے سیٹ پر بھی وہ جوہی چاؤلہ سے فاصلہ رکھتے تھے۔

اپنے اس رویے پر عامر خان نے خود بھی حیرت کا اظہار کرتے ہوئے کہا کہ ’جانے کیوں میں نے ایسا رویہ اپنایا تھا، میرے خیال میں تب میں کچھ حد تک انا پرست تھا۔‘

مسٹر پرفیکشنسٹ نے اپنی ناراضگی کے بارے میں مزید بتایا کہ اگر جوہی چاؤلہ ان کے پاس آکر بیٹھتیں تو وہ اٹھ کر باہر نکل جاتے تھے۔

عامر خان نے ہنستے ہوئے کہا کہ ’میں کم از کم پچاس فٹ دور بیٹھتا تھا، صرف سینز کے دوران بات کرتا تھا، وہ بھی صرف کام سے متعلق۔‘

عامر خان اور جوہی چاؤلہ کے درمیان دوستی 2002 میں بحال ہوئی جب عامر خان کی اپنی سابقہ اہلیہ رینا دت سے طلاق کا معاملہ چل رہا تھا۔

جوہی چاؤلہ کی رینا دت سے بھی بہت اچھی دوستی تھی۔ جب جوہی چاؤلہ کو طلاق کے بارے میں علم ہوا تو انہوں نے ناراضگی کے باوجود عامر خان کو فون کیا اور ملنے کو کہا۔

جوہی چاؤلہ کی کوشش تھی کہ طلاق کے بجائے عامر خان اور رینا دت کے درمیان اختلافات حل ہو جائیں۔

عامر خان کا کہنا تھا کہ جوہی کو معلوم تھا کہ وہ ان کا فون نہیں اٹھائیں گے، لیکن پھر بھی جوہی نے انہیں فون کیا۔

عامر خان کا کہنا تھا کہ جوہی کی اس کوشش سے انہیں اندازہ ہوا کہ اختلاف کے باوجود دونوں کے درمیان دوستی پر بالکل بھی کوئی فرق نہیں آیا۔

’بے شک ہم آپس میں چیت نہیں کر رہے تھے لیکن ایک دوسرے کی فکر پھر بھی تھی۔‘

عامر خان کی 56 ویں سالگرہ کے موقع پر جوہی چاؤلہ نے مبارکباد دیتے ہوئے کہا کہ وہ خود کو بہت خوش قسمت سمجھتی ہیں کہ انہوں نے عامر خان کے ساتھ کام کیا اور مزیدار یادوں کے علاوہ کئی یادگار فلمیں بھی ساتھ بنائیں۔