مقتول کے خاندان نے بیٹے کے قاتل کو عید کے دن معاف کر دیا

سعودی عرب کے شہر خیبر الجنوب میں رہائش پذیر ایک خاندان نے عید کے دن اپنے بیٹے کے قاتل کو معاف کرنے کا اعلان کیا ہے۔

سبق ویب سائٹ کے مطابق قبیلہ بنی واہب شہران کے خاندان آل راجح نے کہا ہے کہ ’اس نے اپنے مقتول بیٹے عبد اللہ کے قاتل کو فی سبیل اللہ معاف کر دیا ہے، انہیں قاتل کے خاندان سے کچھ نہیں چاہیے‘۔

واقعے کی تفصیلات بتاتے ہوئے قاتل کے بھائی رجا زامل آل شاہر الشہرانی نے کہا ہے کہ ’ہم مقتول کے خاندان کے برسوں سے پڑوسی ہیں۔‘

’دونوں خاندانوں کے تعلقات بحران کے وقت بھی معمول کے مطابق ہی رہے جبکہ قاتل ہونے کی وجہ سے ہمارے خاندان نے محلہ چھوڑنے کا فیصلہ کیا مگر مقتول کے خاندان والوں نے ہمیں ایسا کرنے سے منع کر دیا۔‘

’قبیلے کے بزرگوں نے جب صلح کی کوششیں شروع کیں تو ہماری والدہ سے کہا گیا کہ وہ مقتول کی والدہ سے جا کر معافی مانگے اور صلح کی گزارش کرے مگر ہماری والدہ نے ایسا کرنے سے انکار کر دیا۔‘

’ہماری والدہ نے کہا کہ مقتول بھی میرا بیٹا ہے اور اس کی ماں میری بہن ہے اور قاتل بھی میرا بیٹا ہے۔‘

انہوں نے کہا ہے کہ ’پھرعید کے دن میری والدہ کو مقتول کی والدہ کی طرف سے فون آیا اور عید کی مبارکباد دی اور خوشخبری سنائی کہ انہوں نے قاتل کو محض اللہ کی رضا کی خاطر معاف کر دیا ہے۔‘

’مقتول کے خاندان کے اس اقدام پر ہم انتہائی احسان مند اور شکر گزار ہیں، ہم نے شکریہ کے طور پر ان کے گھر کے سامنے سلامی پیش کرنے کے لیے سفید جھنڈا لہرا دیا ہے۔‘